28. Sequuntur triginta tres salutationes ad Christum secundum quod

triginta tribus annis vixit in terra.

1. Ave, Iesu, te colimus,

Adorantes te petimus,

Ut, quae de te recolimus,

Acceptos, rex piissimus.

2. Ave, Iesu, rex omnium,

Scrutator alme cordium,

Infirma tu scis virium,

Nobis sis in auxilium.

3. Ave, Iesu piissime,

Ave, rex clementissime,

Audi preces miserrimae

Et peccatricis animae.

4. Ave, Iesu, fons luminis

Es et omnis dulcedinis,

Corpus intrasti virginis

Naturam sumens hominis.

5. Ave, Iesu, cui sidera

Deserviunt et aethera,

Te intra sua viscera

Clausit virgo puerpera.

6. Ave, Iesu, de virgine

Sine virili semine

Natus fuisti, Domine,

Sine omni gravamine.

7. Ave, Iesu, pastoribus

Ostensus ex caelestibus

Fuisti collaudantibus

Angelicis spiritibus.

8. Ave, Iesu, quem viderunt

Magi et adoraverunt,

Muneraque obtulerunt

Et gaudentes redierunt.

9. Ave, Iesu, quem lactavit

Virgo mater atque pavit,

In templo te praesentavit

Implens, quod lex imperavit.

10. Ave, Iesu, qui omnibus

Prope es invocantibus

Dulcisque te quaerentibus,

Sed plus invenientibus.

11. Ave, Iesu, qui doctorum

In medio doctor horum

Inventus es, nos tuorum

Duc per viam mandatorum.

12. Ave, Iesu, qui temptari

Sed nequaquam superari

Voluisti, modo pari

Da nobis te imitari.

13. Ave, Iesu, quem osculo

Tradidit Iudas populo,

Me pietatis oculo

Cerne parceque sedulo.

14. Ave, Iesu Christe pie,

Qui alapas in facie

Sputa, verba blasphemiae

Passus es, sol iustitiae.

15. Ave, Iesu, pro miseris

Tuis portasti umeris

Cum tormentis innumeris

Crucem, cum non merueris.

16. Ave, Iesu, qui gravia

Tormenta et supplicia

Pro tuorum miseria

Mira passus es gratia.

17. Ave, Iesu, qui pendentem

Et iuxta te morientem

Suscepisti, me praesentem

Salva, precor, te petentem.

18. Ave, Iesu, matrem tuam

Iohanni dixisti suam

Esse, curam praecipuam

Donans ei perpetuam.

19. Ave, Iesu, me commendo

His duobus, deprecando,

Ut deleas miserando,

Quae commisi in precando.

20. Ave, Iesu, sit passio

Tua nobis defensio,

Peccatorum remissio,

Virtutum exhibitio.

21. Ave, Iesu, descendisti

In infernum et fregisti,

Sanctos inde eduxisti,

Cum sepultus iacuisti.

22. Ave, Iesu, agne Dei,

Dator verae requiei,

Decor omnis speciei,

Miserere, precor, mei.

23. Ave, Iesu, qui dolore

Victo mortis et sopore

Surrexisti cum decore

Gloriaque et honore.

24. Ave, Iesu, rex gloriae,

Ave, Iesu, rex gratiae,

Ave, decus ecclesiae

Et rex plenus victoriae.

25. Ave, Iesu, corpus tuum,

Quod pro me fuit mortuum,

Sit mihi in perpetuum

Cibus et dux affectuum.

26. Ave, Iesu, lux mentium,

Ave, dulcedo cordium,

Nostrum fer desiderium

Ad te, potens rex omnium.

27. Ave, Iesu, tu sanitas

Nostra sis atque bonitas,

Esuries, satietas

Delectansque suavitas.

28. Ave, Iesu, qui caeloram

Ascendisti, rex eorum,

Super alta, dux sanctorum,

Saeptus choris angelorum.

29. Ave, Iesu, da veniam,

Ave, Iesu, da gratiam,

Tibi digne ut serviam

Atque ad te perveniam.

30. Ave, Iesu, dans spiritum

Sanctis tuis paraclitum,

Esto precor ad obitum

Meumque muni exitum.

31. Ave, Iesu, qui venturus

Omnes es iudicaturus,

Bonos glorificaturus,

Malos iuste damnaturus.

32. Ave, sancta humanitas,

Ave, beata deitas,

Ave, colenda trinitas

Et adoranda unitas.

33. Ave, pater ingenite,

Ave et, unigenite,

Ave, sacer paraclite,

Salva, me Deas inclite.