Sermo III .

Item, sermo fratris Bonaventurae editus eadem Dominica secunda in Conventu Fratrum de Colonia, editus in Capitulo.

Veni , Domine Iesu, Apocalypsis ultimo .

Sacer Evangelista Ioannes in sua Apocalypsi, sacro inspiratus afflamine, pro tempore isto gratiae Salvatoris adventus in verbis invocativis hujusmodi tria in persona Ecclesiae facit. Primo recognoscit reverentissime sui principii sublimem originem, cum dicit: Domine; secundo implorat devotissime divini adventus desideratam consolationem, cum subdit: veni; tertio exprimit iucundissime sui amoris seu affectus fontalem delectationem, cum addit: Iesu, quod est nomen dulce laudare et nominare.

I. Quantum ad primam partem nota, quod personam Verbi incarnati appellat beatus Ioannes Dominum, quia ipse superexcellenter potest omnia , et ideo per ipsum habemus subsistere; Iudith ultimo : Adonai Domine, magnus es tu et praeclarus i n vir tute tua.

Supersplendenter novit singula, et ideo per ipsam habemus intelligere; Actuum primo : Domine, qui nosti omnia, antequam fiant.

Superaffluenter diligit cuncta, et ideo per ipsum habemus salvari; Psalmus : Dixi Domino: Deus meus es tu, quoniam bonorum meorum non eges.

Supersapienter regit universa, et ideo per ipsum habemus conservari; Sapientiae nono : Domine Deus, qui sapientia tua constituisti hominem, ut dominaretur creaturae, quae a te facta est.

II. Quantum ad secundam partem nota, quod divini adventus consolatio est omnibus et ab omnibus imploranda et memoranda. Venit enim ad nos Dei Filius ut mediator gratiae ad exhibenda remedia pacis et concordiae; ad Ephesios secundo : Veniens evangelizavit pacem vobis, qui longe fuistis, et pacem iis qui prope etc.

Ut doctor sapientiae ad danda documenta pietatis et iustitiae; Osee decimo : Veniet qui docebit vos iustitiam.

Ut pastor animae ad induenda solatia suavitatis internae; Ioannis decimo : ''Ego veni, ut vitam habeant et abundantius habeant.

Ut ordinator vitae ad exhibenda exempla sanctitatis et innocentiae; Matthaei vigesimo primo: Ecce, rex tuus venit tibi mansuetus, sedens super asinam ''etc.

III. Quantum ad tertium nota, quod nomen Iesu est nomen sub caelo datum hominibus, in quo oporteat nos salvos fieri, sicut dicitur Actuum quarto . Et ideo est nobis super omnia amandum, venerandum et desiderandum. Ipsum enim nomen iesu est tam mirificum, tam gloriosum, tam gratiosum, quod script um lucet sive resplendet; Ioannis decimo nono .

Meditatum recreat et delectat; ad Galatas ultimo .

Nominatum dirigit et confortat; ad Colossenses secundo .

Invocatum animal et inflammat; ad Hebraeos quarto .

Praedicatum clarificat et illustrat; secundae ad Corinthios quarto .

Disputatum solidat et confirmat; Actuum decimo quinto .

Lectum ampliat et dilatat; Apocalypsis primo .

Depictum intonat et inclamat; ad Hebraeos duodecimo .

Ruminatum suavificat et laetificat; ad Hebraeos duodecimo .

Contemplatum elevat et sublimat; secundae ad Corinthios duodecimo .

Desideratum componit et ordinat; ad Philippenses primo.

Honoratum perficit et salvat; primae Petri secundo .