EXPOSITIO TEXTUS.

Occultus autem, etc.

Deinde facit antipophoram, respondens tacitae quaestioni, quae ex posita solutione videtur oriri : quia enim dixerat, quod venit Christus per Incarnationem de occulto ad manifestum, posset aliquis quaerere, utrum post Incarnationem fuerit omnino manifestus ipse et sua unio et incarnatio. Et ad hoc respondet dicens, quod venit quidem ad manifestationem, occultus autem mansit et post manifestationem, aut, ut divinius dicam, et immanifestationem, id est, post Incarnationem, quae manifestatio ipsius dicitur, quia per illam nobis visibilis apparuit, sed dignius dicitur immanifesiatio, propter occultum unionis. Et hoc enim Jesu,

id est, ipsum etiam sacramentum Incarnationis Jesu Christi non solum mysterium divinitatis ipsius est absconditum, et mysteriam, id est, occultum, quod est secundum ipsum, scilicet Christum incarnatum, nullo sermone, nulla mente est eductum, id est, explicitum : sed et, id est, etiam dictum manet ineffabile, et intellectu manet ignotum : quia nec sufficienter dici, nec sufficienter intelligi potest.