26. De sancta Afra.

1. Ad auram post meridiem

Deus lapsum quaerit hominem,

2. In cuius corde

sol occiderat iustitiae,

3. Quem serpens prima
spoliaverat tunica ;

4. Sed nudatus innocentia
defensionis texit folia,

5. Dum confiteri erubuit,
quod hosti naturae succubuit,

6. Immo reatum proprium
in creatoris retorsit vitium:

7. " Quam", inquit, " dabas sociam,
mulier escam tribuit vetitam."

8. Transgressor ergo pellitur,
ad vitam conditus
morte moritur ;

9. Perditus tandem quaeritur,
virginis partu

inventus reducitur,

10. Dum latro, Matthaeus,

lacrimosa Maria, Zachaeus,

11. Saulus, adultera

salvantur, David, Raab, Afra,

12. Insula quam Cyprus

nostrum dat cernere litus

13. Et veniae gremium

nobis ostentat apertum,

14. Dum turpem idolatriam
vera mundet paenitentia

15. Atque dignam martyrio
Christi faciat confessio.

16. Cuius meritis omnia

purgentur nostra crimina,

17. Ut angelorum gaudiis
perfruamur sempiternis.