27. De sancta Afra.

1. Gloriam Deo

patri canamus et filio,

sancto paraclito,

2. Qui ab arce patris

Deus summus et humilis

3. Missus venit, mitis

intrans uterum virginis,

4. Ut peccatores sanaret

et iustos faceret,

5. Ut congregaret dispersos,

liberans perditos.

6. Quosdam elegit

plebis doctores

perfectos

et ecclesiae pastores,

7. Variis signis

et documentis

plurimis,

qui converterent peccatores,

8. Promittens veniam

et vitam credentibus

in se hominibus,

9. Ut regni concives

caelestis participes

essent et consortes ;

10. Peccantes puniens,

delinquentes corrigens,

emundans paenitentes,

Errantes condemnans,

fideles quosque

et iustos salvificans ;

11. Qui signis reprobos

et exemplis, virtutum

miraculis instruxit,

Per verbum salutis

et veritatis

incredulos corrigit.

12. De quorum collegio

confessor almus Narcissus

praesul claruit.

13. Augustam adiit

domum ignorans Afrae

et introivit.

14. At illa gaudens

pro amatore

electum pontificem suscepit ;

15. Sanctum cognoscens

plorans et gemens

praesulis pedibus se prostravit.

16. Et pontifex, ut percepit,

Domino pro illa preces fudit,

17. In fide sacra instruxit

eam, sacro fonte et abluit.

18. Post liaec Afra exquiritur,

minis, terroribus,

dolis attemptatur,

christianam sese protestatur)

19. Ad idola compellitur,

vincta adducitur,

iudici praesentatur,

Christum corde et ore fatetur ;

20. Ignibus viva datur,

flammis exuritur,

sicque martyr efficitur ;

21. Spiritum caelo reddens,

Deum benedicens

aeterna dona possidet.

22. O clemens rector polorum

redemptor et cunctorum,

nobis dona praemia;

tibi sit laus et gloria.