28. Hymnus de Cruce.

1. Iam in cruce mundi salus
Et pependit iam salvator,
Cui honoris omnis laus,
Ipse fuit triumphator ;
O quam dirus fuit clavus,
Carnis Christi perforator!

2. Iam fuit Christus venditus
Ab illo Iuda pessimo,
Per Iudam fuit traditus
Hic populo Iudaico,
Iudex Pilatus Pontius
Quem tradidit supplicio.

3. Fel, acetum et arundo
Spinique, clavi, lancea
Minaeque vulnus Domino,
Passiones [et] verbera,
Mors sub Pilato Pontio,
Iniuriarum verbera.

4. In cruce Christi caritas
Et populi redemptio,
Mors, vita, via, veritas
Nimisque dira passio,
In cruce summa sanctitas
Salutisque largitio.

5. Tu es, crux, sanctificata
Sanctissimis vestigiis,
Tu es, crux, clarificata
Sanctissimis prodigiis,
Tu es, crux, magnificata
Sanctissimis suffragiis.

6. Tu atrocis passionis
Salutis es remedium,
Tu es crux redemptionis
Tu prostrasque daemonium,
Tu es crux salvationis,
In te videmus gaudium.

7. Nam fuit in te proelium,
Pugna, certamen, passio,
Mors, vita, virtus, praemium
Salusque, lux, salvatio;
Christus redemit populum
Ex sanguine sanctissimo.

8. Haec omnia nos satient,
Portemus in memoria,
Nos dulciter inebrient,
Nobis concedant praemia,
Virtutibus nos repleant,
Ut simus digni gloria.

9. Praemittatur[que] hoc signum
In omnibus, quae gerimus,
Hoc sequamur nos vexillum,
Beati nos, qui quaerimus
Istud sacrum certe lignum,
Amemus corde protinus.

10. Divina crux inventio,
Erat ipsa res celata,
In ipsaque afflictio,
Fuit vita reparata,
In eaque redemptio,
Est humanitas sanata.

11. Signum crucis quem defendit,
Eum facitque securum,
Inimicus non offendit,
Facit hominemque purum,
Cessat daemonque recedit,
Tollit malumque venturum.

12. Hoc signum est defensio,
Beatus vir, qui sequitur,
Ibi nulla confusio,
Si hoc praemisso geritur,
Cum eo quis in gaudium,
Ommisso quis confunditur.

13. Quis incedit quasi caecus
Sine signo sanctae crucis,
Sed cum eo vadit laetus,
Sibi lucet lumen lucis,
Inde cessat omnis metus,
Deum enim tu conducis.

14. Crucis sanctae potens signum
Nos fulciatur, societ,
Nobis cunctis sit benignum
Nosque virtute roboret
Pellat omneque malignum
Nobisque bona praeparet.