30. De sancto Spiritu.

la. Sancti spiritus

Assit nobis gratia,

1 b. In qua caelitus

Datur efficacia.

2 a. Nam benignus spiritus,

Dextrae Dei digitus

Pulsans chordas cordium,

2 b. Statim mentem suscitat

Et amorem excitat

Cordibus fidelium.

3 a. Pro nobis gemitibus

Inenarrabilibus

Cum effectu postulat,

3 b. Quando facit petere

Bonum et appetere,

Qui sic dona cumulat.

4 a. Iam dulci solamine

Mens mundatur crimine

Miraturque subito

4 b. Posse, quod non poterat,

Esse, quod non fuerat,

In hoc Dei digito.

5 a. In quo vere vivimus,

A quo vere credimus

Universa condita:

5 b. In quo dantur munera,

Remittuntur scelera,

Restaurantur perdita.

6. Oleum laetitiae,

Dispartitor gratiae

Sed indivisibilis.

7 a. Ignis urens vitia,

Flumen rigans varia

Corda, quae docuerit.

7 b. Auster, qui charismata

Confert, et aromata

Fluunt, dum adfiaverit.

8 a. Veni, aura, temperans

Omnia et moderans

Omnes sensus hominis ;

8 b. Splendor, cor illuminans

Et ob hoc eliminans

Taetram umbram criminis.

9 a. Dei donum, caritas,

Fons bonorum, bonitas,

Amor suavissimus;

9 b. Rationum ratio,

Certa consolatio,

Tutor benignissimus.

10 a. A patre ingenito

Et ipsius genito

Procedens aequaliter,

10 b. Utrique consimilis

Et honore parilis

Indivisibiliter.

11a. Habitator mentium

Te pie quaerentium

Et magister optime,

11b. Ebrietas sobria,

Mentes nostras debria,

Gaudium, pax animae.

12 a. Par patri et filio,

Alto nos consilio

Consolare caelitus

12 b. Et, quod vere diceris,

Nobis esse miseris

Digneris, paraclitus,

13 a. Ut in spiritalibus

Atque temporalibus

Agentes feliciter

13 b. Consequamur postea

Te duce siderea

Regna caeli iugiter.