Sermo VII.

Item, sermo fratris Bonaventurae in Conventu Lugduni editus in Capitulo coram.... eadem Dominica in mane.

Deus autem spei repleat vos omni gaudio et pace in credendo, ut abundetis in spe et virtute Spiritus sancti , ad Romanos decimo quinto .

In verbis his Apostolus, maximus zelator humanae salutis, pro isto sacro tempore Christi adventus optat Christianis quinque, quae sunt eis valde necessaria, scilicet serenitatem sive suavitatem beatae aeternitatis, cum dicit: Deus autem spei repleat vos omni gaudio; ad Philippenses quarto : Gaudete in Domino semper, iterum dico: Gaudete.

Tranquillitatem sive quietem silentii devotae mentis, cum dicit: et pace; ad Philippenses quarto: Et pax Dei, quae exsuperat omnem sensum, custodiat corda vestra et intelligentias vestras in Christo Iesu.

Sinceritatem seu puritatem fidei Christi Divinitatis et humanitatis, cum dicit: in credendo; secundae ad Timotheum secundo: Si non credimus, ille fidelis permanet, negare se ipsum non potest.

Soliditatem sive integritatem spei aeternae felicitatis, cum dicit: ut abundetis in spe; secundae ad Corinthios primo : Ut spes nostra firma sit pro vobis.

Firmitatem sive perseverantiam in fortitudine geminae caritatis, cum addit: et virtute Spiritus sancti; ad Romanos octavo : Certus sum enim, quia neque mors, neque vita, neque Angeli, neque Principatus, neque Virtutes, neque instantia, neque futura, neque fortitudo, neque altitudo, neque profundum, neque creatura alia poterit nos separare a caritate Dei, quae est in Christo Iesu Domino nostro; supple: geminata ad nostrum exemplum.