30. De sancto Andrea.

1. Sacrosancta hodiernae

festivitatis praeconia

2. Digna laude universa

categorizet ecclesia

3. Mitissimi sanctorum

sanctissima

extollendo merita

4. Apostoli Andrae

admiranda

praefulgentis gratia.

5. Hic accepto

a Iohanne Baptista,

Quod venisset,

qui tolleret peccata,

Mox eius intrans

habitacula

audiebat eloquia ;

6. Inventoque

fratre suo Bariona

"Invenimus",

ait ovans, ''Messiam "

Et duxit eum

ad dulcifluam

salvatoris praesentiam.

7. Hunc perscrutantem maria

Christi vocavit clementia

8. Artem piscandi commutans

dignitate apostolica.

9. Huius animam post sacra

festi paschalis tempora

10. Sancti Spiritus praeclara

perlustravit potentia

11. Ad praedicandum

populis paenitentiam

12. Et Dei patris

per filium clementiam.

13. Gratulare ergo

tanto patre, Achaia,

Illustrata eius

salutari doctrina,

Honorata multimoda

signorum frequentia.

14. Et tu gemens plora,

trux carnifex Aegea ;

Te lues inferna

et mors tenet aeterna.

Sed Andream felicia

per crucem manent gaudia.

15. Iam regem tuum spectas,

iam adoras,

iam in eius conspectu,

Andrea, stas,

16. Odorem suavitatis

iam aspiras,

quem divini amoris

aroma dat.

17. Sis ergo nobis inclita

18. Dulcedo spirans intima

19. Caelestis vitae balsama.