32. De Corpore Christi.

1. O panis vivifico,

Donum singulare,
Des tua deifice

Nomina tractare ;
Nempe tua nomina
Consecrata semina

Large fruge turgent,
Haec rorem charismatum,
Haec fluenta dogmatum

Sacro typo praebent.

2. Salve, eucharistia,

Fons deliciarum,
Nomine, re, gratia,

Dulcor animarum ;
Salveto piissimis
Amicis dulcissimis

A Jesu collata,
Dones sacra satie,
Fruar tua facie,

Anima beata.

3. O donum magnificum,

Fluens largitate,
Salve hilarificum,

Ardens caritate;
Salve nobilissimum,
Sufficientissimum,

Utile damnatis,
Danti cor fortissimum
Te laudo gratissimum

Vere datum gratis.

4. Salve, cibus regius

Nobilis natorum,
Suavis et egregius

Omnium saporum ;
O esca lautissima,
Manhu, prudentissima

Pista trinitatis,
Opple languidissimam
Per affectum animam

Cibo pietatis.

5. O potus dulcissime,

Laticis fluentum,
Salve sapidissime

Languentis fomentum ;
Salve, jucundissimum
Vinum meracissimum,

Ebries bibentes,
Geminato virgines
Atque mentis cardines

Fac mero calentes.

6. Salveto, communio

Omnium bonorum,
Hominum tu unio

Atque angelorum,
Praestes influentiam,
Praestes accrescentiam

Capitis in membra,
Tuis passionibus
His communionibus

Dedicas commembra.
7. Salve, sacrificium

In cruce litatum
Mirum sacrificium,

Figuris signatum,
Te laudo dignissimum,
Deo acceptissimum,

Sanctum juramentum,
Salve pontificium
Christi sacrificium

Patris spiramentum.
8. Salve, admirabile

Jesu sacramentum,
Insigne, amabile

Tu medicamentum,
Tu commemoratio
Atque exaltatio

Christi passionis,
Te laudo, signatio,
Supemae gustatio

Jam fruitionis.