33. De Corpore Christi.

1 a. Salve, caro Christi Iesu,
Pulchra visu, dulcis esu,
Firmamentum fidei.

1b. Tu Mariae carne nata,
Mundi salus praeoptata,
Flos ventris virginei.

2 a. Lac a matre suscepisti,
Dum in foeno iacuisti
Coram animalibus.

2 b. Nobis facis dulce forum
Reddens panem angelorum
Pro foeno credentibus.

3 a. Ara crucis immolata,
Nostra tulisti peccata
Pandens vitae ianuam.

3 b. Manna pavit Israelem,

Sed nunc pascis tu fidelem
Ad vitam perpetuam.

4 a. Pascha novum celebratur,
Agnus Dei dum assatur
Pro salute saeculi.

4 b. Huc ad mensam convenite,
Epulandi cibo vitae,
O fideles populi.

5 a. Caro Christi o sacrata,
Forma panis occultata,
Tu nostrum viaticum,

5 b. Praesta nobis robur mentis
Et devictis temptamentis
Duc ad regnum caelicum.

6 a. Sanguis Christi, qui lavisti
Et a culpis redemisti
Nos ab hostis manibus,

6 b. Fac nos in te consolari
Et tuorum sociari
Sanctorum agminibus.