36. De Visitatione BMV.

In 1. Vesperis.
Antiphonae.

1. Sacerdos novae gratiae
Et rex aeternae gloriae,
Superni patris natus,
Sanctorum in splendoribus
Ex virginis visceribus
Est nobis incarnatus.

2. O praeclara virginitas,
Ecce, tua sterilitas

Deletur per Mariam,
En, multae prolis fertilis
Fit virgo mater humilis,

Dum generat Messiam.

3. Eva peccans viventium
In hac valle miseriae
Fit mater miserorum,
Sed tu, Maria, omnium,
Qui vivent vita gloriae,
Es mater salvandorum.

4. Evae salus promittitur,

Quod mulier sub pedibus
Terat caput serpentis,
In te, virgo, perficitur

Istud, hostis dum fraudibus
Resistitur furentis.

5. Dum Gabriel annuntiat
Et virgo fidem reserat,
Tunc verbum incarnatur,
Laeta mater tripudiat,
Ad Elisabeth properat
Ut cum ipsa loquatur.

Ad Magnificat.

A. O mater omnis gratiae,
Maria, spes laetitiae,
In tua praesentia
Tristes consolantur ;
Cognatam dum visitas,
Hanc lustrat nova claritas,
Deique mysteria
Sibi revelantur.
Laeta Deum magnificas
Teque ancillam replicas
Christum novem mensibus
In ventre portando,
Nos afflictos visita
Et mortuos resuscita

Sanctum flamen mentibus
Nostris inspirando.

Ad Matutinum.
Imitatorium.

Mater Dei, nos visita
Delens nostrum reatum,

Nos ad psallendum excita
Ostendens tuum natum.

In 1. Nocturno.
Antiphonae.

1. Ex ore sanctae feminae
Mariae laus ornatur,
Hanc pro divino germine
Benedictam testatur.

2. Rex suum tabernaculum
In virgine locavit
Et ad salvandum saeculum
Ut gigas exsultavit.
3. Portas, quas Eva clauserat
Hosti consentiendo,
Virgo Maria reserat
Gabrieli credendo.

Responsoria.

1. Virgo prudens infantiam
Virtutibus ornavit,
Mox ut Dei notitiam
Intelligens captavit,
Per summam diligentiam
Ipsum timens amavit.
V. Ab omni munda vitio
Creatoris servitio
Se totam coaptavit.
2. Ut aurora progrediens
In fide perlustratur,
Luna defectum nesciens
In mundo conversatur,
Procedens ut sol oriens
Divina contemplatur;
V. Virtutibus proficiens,
Inter adversa patiens
Ad alta sublimatur.
3. Virginitatem voverat

Se semper servaturam,
Nec per Joseph, cui nupserat,

Se timet amissuram,
In Deum, quem dilexerat,
Spem jactat atque curam,
V. Optat, ut serva fieret
Matris Dei, dum legeret
Virginem parituram.

In 2. Nocturno.

Antiphonae.

1. In virginali thalamo,

Dum Christus incarnatur,
Tunc sancti flatus calamo
Verbum abbreviatur.

2. O civitas refugii,

Qua Christus habitavit,
Te ros caelestis fluvii
Fecundus irrigavit.

3. Natus homo de virgine
Deus, qui nos creavit,
Caeli cives in sanguine
Suo nos consecravit.

Responsoria.

1. Virgo respondet nuntio:
Ecce, ancilla Domini ;
Responsum o quam gratum I
Mox fecundatur filio,
Deus junctus est homini,
Fit verbum incarnatum.
V. Sic datur benedictio

Sanctorum patrum semini,
Complentur verba vatum.
2. Postquam Christum conceperat,
Ad Elisabeth properat

Et prior salutavit,
Mox ad Christi praesentiam
Johannes sensit gratiam
Et clausus exsultavit.
V. In auiibus ecclesiae
Vox tua sonet hodie,
O nata regis David.

3. Alvus tumescit virginis,

Dum Christum novem mensi-
bus
Virum perfectum gestat,
Ex dono sancti flaminis
Nec taedio nec tristibus
Infans illam molestat ;
V. Nox instat novi luminis,
Dum angelus pastoribus
Messiam manifestat.

In 3. Nocturno.
Antiphonae.

1. Congratulemur virgini,
Quae parit sine poena,
Pax nuntiatur homini,
Refulget lux amoena.

2. Per lac Mariae virginis,
Quod, Jesu rex, suxisti,
Dele flammam libidinis
In nostra carne tristi.

3. Dum magis et pastoribus
Se Jesus revelavit,
Cor virginis cum laudibus
Haec verba conservavit.

Responsoria.

1. Dum virgo flexis genibus
Devotis staret precibus

Suspensa contemplando,
Sine dolore parvulum
Mox parit intra stabulum,
Quem levat salutando:
V. Mi fili, bene venias,
Mi tibi Deus gratias,
Dicamus collaudando.

2. Innixa super filium
Et affluens divitiis
In caelum exaltaris,
Te chorus caeli civium
Circumdat rosis, liliis,
Sic virgo coronaris.
V. Cunctis creatis praesidens
Et summo throno residens
Nos semper tuearis.

3. Festina, ne tardaveris,
Veni, succurre miseris,
O potens imperatrix,
Expugna vires hostium,
Sis ad te fugientium
Servorum propugnatrix ;
V. Pro nobis in judicio
Responde tuo filio,
O dulcis mediatrix.

In Laudibus.
Antiphonae.

1. Adstans a dextris filio,
Laudis induta pallio,
O mundi advocata,

Ad unitatis gratiam
Fluctuantem ecclesiam
Reduc cum prece grata.

2. O dispensatrix gratiae,
Regina caeli curiae,

Velata sponsa Dei,
Nos ut Johannem visita
Et leva nostra capita

In plausum sanctae spei.

3. Pretiosis monilibus
Ornata prae doloribus,

Pro nato quos tulisti,
Nos, virgo, fac recolere
Et in corde revolvere

Poenas et crucem Christi.

4. Te benedicunt sidera
Et cuncta Dei opera,
O virgo benedicta,
In tuo datur filio
Promissa benedictio

5. Dum dubitarent singuli
In morte Christi populi,

Tu fidem tenuisti,
Hinc regnare per omnia,
Et coronari gloria

Prae cunctis meruisti.

Ad Benedictus.

A. Benedictus Emanuel,

Qui visitavit hominem
Et redemptionem Israel

Per visitantem virginem
Intimavit praecursori,

Cum salute humili
Unde laudes salvatori

Clamanter a sterili.

In 2. Vesperis.

Ad Magnificat.

A. O virago perinclita.

De qua vir summus sumitur,

Humilitate praedita,

Dum Deus in te clauditur,
Montana velut subdita

Petis, et lumen oritur ;

Hinc cana pandit abdita,
Et infans clausus loquitur

Secreta caeli condita,
Verusque sol detegitur.