36.

I.

1. Magnificat

Anima mea Dominum,

Qui judicat
Verba, cor, renes hominum
Ponensque mortis terminum

Per Adam propagatae.

2. Exterminat

Pristini semen gemitus

Et seminat
Gaudia nobis spiritus,
Gratia pluens coelitus
Vitae ros innovante.

3. Qui despicit
Populi fastus veteris

Et respicit
Ancillae fletum pauperis,
Proles humani generis

Jam me beatam dicet.

II.

1. Ostendunt Dei semitas
Parentes ab initio,

Pius amor et veritas,
Sed praeminet judicio,
Quae non turbatur odio,

Dulcis ejus benignitas,
Neque frigescit senio,
Sed semper sine taedio

Fervet paterna caritas
Erga Deum timentes.

2. Jejunae mentis macie

Contracta terra gentium,

Panis affertur gratiae;
Solve laeta jejunium,
Respiret mens ad gaudium,

Granum coelestis patriae
Mortis in exterminium
Vitae largitur prandium,

Pulsa cordis esurie

Quod Deus implet bonis.

3. Jam solvens, quod promiserat
Abrahae sancto semini,

Summis ima confoederat
Descendens verbum Domini,
Pacem reportans homini

Imbrumque clausum reserat
Unita carne numini,
Quod est concessum nemini,

Nisi, quem virgo generat,
Qui matris est origo.