38. Laudes Iesu Christi.

1. Te cupio salutare,

Sanctum Dei salutare,

Salutans te glorifico

Et pro posse magnifico.

2. Te quaeso, ne despicias,

Sed clementer suscipias

Salutes, quas nunc offero

Saluti, quam desidero.

3. Ave, Iesu, fili Dei,

Ave, finis meae spei,

Ave, Iesu nomen pium,

Ave, vitae principium.

4. Ave, Iesu, nomen bonum,

Summi patris summum donum,

Ave, Iesu, nomen carum,

In quo nihil est amarum.

5. Ave, Iesu, mel in ore,

Semper novus in amore,

Ave, Iesu, dulce melos,

Quod resonat supra caelos.

6. Ave, iubilus mentium

Te vere sitientium,

Non est mirum, si iubilat,

In quo tantus sol rutilat.

7. Ave, melle praedulcior

Et satis odoratior

Quam quaelibet aromata,

In te vera sunt sabbata.

8. Ave, Iesu, rex virginum,

Quae te Deum et Dominum

Sequuntur locis omnibus

Claris canentes vocibus.

9. Iesu, tibi sunt proximi,

Qui sunt carne mundissimi,

Si mens carni respondeat

Nec vana laude gaudeat.

10. Tibi placet virginitas,

Cui non deest humilitas,

Sed virgines non humiles

Tibi sunt contemptibiles.

11. Ave, Iesu, fons hortorum,

Cor humectans aridorum,

Tu flos campi convallium,

Confortans visus gentium.

12. Ave, Iesu, nomen dulce,

Meum triste cor demulce,

Ave, Iesu, nomen vivum,

Habens in te vitae rivum.

13. Iesu, nomen amabile,

Prae cunctis memorabile,

Nam fidenter memoratur

Et frequenter invocatur.

14. Iesus exstirpat vitia

Et expellit daemonia,

Dat, auget, fovet gratiam,

Confortat conscientiam.

15. Qui Iesum pie nominat,

Cibum salubrem ruminat ;

Ave, Iesu, vera salus,

Quem pavescit omnis malus.

16. Ave, fili summi patris,

Ave, pater tuae matris,

Ave, quem pater genuit,

Sed genito non praefuit.

17. Ave, patri coaequalis,

Inter natos nullus talis;

Ave, patri coaeternus,

Cum sis ipse sempiternus.

18. Deus pater ingenitus,

Tu patri unigenitus,

Ex utroque paraclitus

Sanctus procedit spiritus.

19. Una tibi substantia,

Nec est in hac distantia;

Tres sunt unum, sed non tria,

Consimiles per omnia.

Tu solus, Iesu Domine,

Deus verus cum homine.

20. Ave, caelis excelsior

Et abysso profundior,

Ave, cuius scientia

Non minor quam potentia.

21. Virtus tua totum posse,

Sensus tuus totum nosse,

Nihil est, quod te lateat,

Nil, quod tibi non pareat.

22. Ave, Iesus, bonus agnus,

Malis vero leo magnus,

Ave, Iesu, dux in via,

Introductor in propria,

Nam seductor hic seduxit,

Quem dux iste non conduxit.

23. Ave, sitis bonae dator,

Sitis malae sis sedator;

Ave, serpens fixus palo,

Qui resistis omni malo,

Sana nos a serpentibus,

Nos tam saepe mordentibus.

24. Ave, dilectae lectulus,

Ave, murrae fasciculus,

Ave, murra mortificans

Carnem et cor vivificans.

25. Murrae mortificatio

Est iugis recordatio

Tuae sanctae passionis,

Nostrae pravae actionis.

26. Ave, ros mentem temperans,

Carnis aestum refrigerans,

Mihi sis refrigeratio

A pravo desiderio.

27. Ave, Iesu, cui debeo

Omne bonum, quod habeo,

Nam nihil sunt mea bona

Nisi tua pura dona,

Tu totum mihi tribuis

Et nihil tibi minuis.

28. Ave, Iesa, rex caelorum,

Ave, panis angelorum,

Ave, creator omnium,

Regni caelestis ostium,

Ave, mundi gubernator,

Ave, potens dominator.

29. Ave, quem tremunt angeli,

Quem adorant archangeli,

Ave, cui throni serviunt,

Cui virtutes oboediunt.

30. In te Cherubim hauriunt

Et Seraphim, quod cupiunt,

Tu totum illis gaudium,

Neque paris fastidium,

Nam iugis tui copia

Accendit desideria.

31. Ave, qui cunctis imperas,

Qui daemones exsuperas,

Ave, patrem glorificas,

Ave, matrem sanctificas.

32. Ave, pater gratiarum,

Ave, custos animarum,

Ave, pastor pii gregis,

Ave, lator novae legis.

33. Ave, regnans .per saecula,

Ave, mundus a macula,

Ave, vera medicina,

Tu malorum es ruina.

34. Ave, vitae verus liber,

Per quem mundus factus liber,

Quisquis in te digne legit,

Ille sese bene regit.

35. Ave, pius et innocens,

Ave, viam vitae docens,

Ave, qui nunquam deficis,

Ave, qui mundum reficis.

36. Ave, lassorum requies,

Ave, decora facies,

Ave, lapis pretiosus,

Ave, totus generosus.

37. O praecellens margarita,

De te solo tu me dita,

Te quaeram, te reperiam,

Praeter te nihil cupiam,

Tu thesaurus esto meus,

Ne plus quaerens fiam reus.

38. Ave, mitis et suavis,

Ave, caeli firma clavis,

Ave, maris unius portus,

Cuius mirus fuit ortus.

39. Ave, dulcedo cordium,

Ave, purgator sordium,

Ave, potens divinitas,

Ave, clemens humanitas.

40. Ave, mentis societas,

Ave, felix ebrietas,

Ave, Christe, vera vitis,

Qui salutem nostram sitis,

Fac tibi semper haeream

Tamquam palmes, ne peream.

41. Ave, vinum laetificans,

Ave, mundum pacificans,

Ave, tutum refugium,

Ave, iuge praesidium.

42. Ave, sanctorum gloria,

Ave, salutis hostia,

Ave, qui stellas numeras,

Ave, qui cuncta ponderas.

43. Ave, dignum vitae lignum,

Pro te colo crucis signum,

Ex hoc ligno progreditur

Omne, quod bonum creditur.

44. Ave, qui bonos dirigis,

Ave, qui malos corrigis,

Ave, legis terminator,

Verbi Dei seminator.

45. Ave, noster advocatus,

Per quem pater est placatus,

Ave, fons indeficiens,

Sitim nostram reficiens.

46. Ave, lapsorum baculus,

Ave, pigrorum stimulas,

Ave, sanctorum speculum,

Ave, qui salvas saeculum.

47. Ave, mundi speculator,

Periculi nuntiator,

Ave, pugnantum clippeus,

Aquae vivae tu puteus.

48. Ave, sanctum cataplasma,

Quo sanatur tuum plasma

A peccati languoribus

Et inferni doloribus.

49. Ave, dives et nobilis,

Totus desiderabilis,

Ave, fons sapientiae

Et amator munditiae.

50. Ave, vita viventium,

Ave, spes molientium,

Ave, virtus debilium,

Ave, comes humilium,

51. Ave, potens auxilium,

Ave, sanum consilium,

Ave, morbi remedium,

Ave, qui tollis taedium.

52. Ave, dulcis et patiens,

Ave, prae cunctis sapiens,

Ave, clemens et benigne,

Ave, iugi laude digne.

53. Ave, fructus benedictus,

Ave, pugil nunquam victus,

Ave, iudex iustissime,

Ave, testis verissime.

54. Ave, doctor veritatis,

Ave, radix caritatis,

Ave, torrens voluptatis,

Fons totius bonitatis.

55. Ave, norma iustitiae,

Exemplar patientiae,

Ave, splendor caelestium,

Ave, lumen fidelium.

56. Ave, fidelis medice,

Ave, frater et amice,

Ave, laboris praemium,

Redemptionis pretium.

57. O pretium sufficiens,

Pro nobis satisfaciens,

Tu ditator egentium,

Tu solamen languentium.

58. Ave, mundi redemptio,

Ave, iustorum portio,

Ave, mortis saperator,

Ave, plebis liberator,

Ave, prudens mediator,

Ave, fortis proeliator.

59. Ave, sine cuius dono

Nullus gaudet ullo bono,

Ave, legis impletio,

Peccatorum deletio.

60. Ave, lapis angularis

Et magister singularis,

Ave, in quo sunt omnia,

Quae[cum]que sunt utilia.

61. Ave, qui primum hominem

Ad divinam imaginem

Creasti mirabiliter,

Sed is miserabiliter

62. A te factus immortalis

Morsu pomi noxialis

In mortem cito cecidit,

Dum Evae nimis credidit.

63. A te fuit elongatus,

Iugo carnis subiugatus,

Paradisum amiserat

Et infernum meruerat.

64. Eius quoque posteritas

Sequens parentum semitas,

Sed tu, Iesu, rex gloriae,

Huic condolens miseriae,

65. Ut miseram reduceres

Patrique satisfaceres,

Non [re]linquens caelestia

Descendis ad terrestria,

Virginis intrans uterum,

Conditor alme siderum.

66. Ave, natus de virgine

Sine virili semine,

Ave, verbum incarnatum,

Ave, numen humanatum.

67. Ave, matrem introiens,

Ave, de matre prodiens,

Ave, Deus absconditus

Forma servilis habitus.

68. Ut Leviathan capias,

Hamus carne te pallias;

Hamus latens divinitas,

Esca patens humanitas.

69. Sic Leviathan decipis,

Cum carnem nostram suscipis,

Qui dum carnis adgreditur

Escam, a hamo capitur.

70. Ave, iacens praesaepio,

Natus in diversorio,

Ave, pannis involutus,

Verbum tacens velut mutus,

Ave, carne circumcisus,

Ave, causa nostri risus.

71. Iesu, mirandum iudico,

Quod tu more Iudaico

Circumcidi te pateris,

Culpam cum non habueris.

72. Baptismatis ablutio

Carnisque circumcisio

In te sunt ad mysterium,

Aliis ad remedium.

73. Ave, quem matris gremio

Stellae conducti radio

Tres magi corde simplici

Honorant dono triplici.

74. Ave, quem laetus tenuit

Simeon, postquam senuit,

Fac, ut nos te complectamur

Et in pace dimittamur.

75. Ave, peccatum destruens,

Sed baptisma non respuens,

Ave, super quem caelitus

Sanctus descendit spiritus.

76. Ave, quem post ieiunium

Temptavit hostis omnium,

Sed temptando succubuit,

Nam in te nihil habuit.

77. Ave, cuius pia vita

Nostra fuit praemunita,

Ut mundum semper fugiat

Caelestiaque cupiat.

78. Ave, fervens praedicator.

Vitiorum resecator,

Doctrina tua continet,

Quidquid ad vitam pertinet.

79. Ave, sub panis specie

Te relinquens ecclesiae;

Hoc mirandum sacramentum

Tuum fuit testamentum.

80. Hinc fides et dilectio

Crescit atque devotio,

Nam dum de te nos satias,

Corde tibi nos socias.

81. Panis formam intuemur,

Sed sub forma confitemur

Carnem iunctam deitati,

Deitatem parvitati.

82. Panis transit substantia,

Sed manent accidentia;

O miranda potentia !

Sed non minor est gratia,

Quod ille, qui sic potuit,

Ita fieri voluit.

83. O creatoris dignitas!

Quanta, qualis humilitas!.

Qui tuis sanctis manibus

Discipulis cernentibus

84. Prostratus pedes abluis.

Tu qui superbos respuis,

Formam praeteudis humilem

Ad te placandum utilem.

85. Ave, quem tradit osculo

Iudas vili munusculo,

Ave, pro me flagellatus,

Ave, spinis coronatus.

86. Tu consputus et illusus,

Tuus sanguis pro me fusus,

Satiatus doloribus

Sociaris latronibus.

87. Ori tuo porrigitur

Acetum, cui fel jungitur,

Post talem potum traditum

Sanctum emittis spiritum.

88. Ave, pro nobis moriens,

Patri semper oboediens,

Ave, manu sanguinea

Dira percussus lancea.

89. Transfixa corde saucio

Tunc Simeonis gladio

Flens mater corde percipit

Vulnus, quod latus recipit.

90. Ave, sepulte Domine,

Descendens in voragine,

Tartarea qui fregisti,

Unde tuos eduxisti.

91. Ave, surgens a mortuis

Et apparens cito tuis,

Ave, scandens ad aethera,

Patris sedens in dextera.

92. Ave, qui patris debitum

Ab aethereis sedibus

Sanctum transmittis spiritum

Discipulorum cordibus.

93. Quaerit purgator scelerum

Hominis mentem hospitem

Et divinorum operum

Hominem facit comitem.

94. O quam clemens benignitas,

O quam suavis caritas,

Docens quid sit fragilitas,

Quid sit virtus et veritas I

95. Ave, iudex adventurus

Et condigne redditurus

Iustis aeterna gaudia,

Malis vero supplicia.

96. Ave, Iesu, potens ignis,

Quod probatur multis signis,

Tu cor accendis frigidum,

Nigrum vertis in candidum.

97. Tu superbos incineras,

Dura mollis, res teneras

Convertis in duritiem,

Mentis erigis aciem.

98. Ave, linguis in igneis

A sedibus aethereis

Promissum mittens spiritum

In gregem tibi subditum.

99. Docti fiunt, ut doceant,

Et fortes, ut sustineant,

Perpetrantque prodigia,

Sic fundatur ecclesia.

100. Dies mihi deficeret,

Et lingua non sufficeret,

Si discurram per omnia

De Iesu laudabilia.

101. Te, Domine, salutavi,

Laudes tuas eructavi,

Sit tibi laus pro omnibus,

Quas de te dixi laudibus.

102. Te, mi Iesu, salutabo,

Nunquam vero refutabo

Me te satis salutasse,

Cum te credam me salvasse.

103. Nam salutans te centies

Provocor ad millesies.

Salus a me salutata,

Fac, ut nunquam sit mutata

Salutantis intentio

A salutis servitio,

104. Sed saluti sic praeviam,

Ut salutem accipiam,

Et cum salus defuerit

Carnis et mors adfuerit,

Tunc peccatorum veniam

Et salutem inveniam.