DUBIUM.

Ad evidentiam primae partis quaeritur, utrum Beata Virgo naturaliter genuerit Christum ?

1. Et videtur, quod sic : quod enim habet virtutem foecundativam, generat

naturaliter : sed Spiritus sanctus (ut dicit Damascenus) dedit Virgini virtutem foecundativam et verbi generativam : ergo ipsa naturaliter genuit.

2. Ad idem, Quamvis caecus miraculose accipiat visum, tamen postea habens visum, naturaliter videt: sed sicut visus est principium videndi, ita potentia generativa quae data est Virgini, est principium generandi : ergo ipsa naturaliter genuit Christum.

3. Item, Ad hoc quod mater concipiat naturaliter et gignat filium, non exigitur nisi quod virtus generativa ipsius excitetur : sed virtus generativa Virginis fuit excitata per operationem Spiritus sancti: ergo naturaliter genuit.

4. Ad idem, Mater non dicitur nisi quia genuit : sed Virgo naturaliter est mater, quia Christus naturaliter est filius hominis et filius Dei : ergo naturaliter genuit.

Ad oppositum :

1. Omnis operatio quae egreditur ab aliquo, manente impedimento illius operationis, est supra naturam, sicut si caecus manens caecus videat: sed virginitas quae semper mansit in Virgine, est impedimentum conceptionis : ergo non concepit naturaliter, sed supernaturaliter.

2. Ad idem, Operatio naturalis dicitur, quae est ex principio activo naturali : sed principium activum generationis in animalibus est in semine maris et non in matre : cum ergo Christus non fuerit conceptus ex semine maris, sed ab agente supernaturali, sua conceptio fuit supernaturalis, et nativitas.

Et hoc quidem concedendum est, et contrarium pro haeresi habendum.

Unde ad primum dicendum, quod Spiritus sanctus dedit Virgini virtutem faecundativam, quae est matris, cujus est .tantum. ministrare materiam et facere

ammeliorationem conceptus propter dispositionem matricis, sicut dicit Avicenna in libro de Diluviis : tota autem actio est in semine maris qui dat animam sensibilem.

Ad secundum dicendum, quod illud non est simile nisi in caeco maneret caecitas : sic enim totus actus est miraculosus.

Ad tertium dicendum, quod a gratia collatum est Virgini, ut naturaliter esset mater Christi, ut patet ex praedictis.

Ad quartum dicendum, quod sicut aliquid potest moveri per se in. loco, cum non sit in loco nisi per accidens, sicut caelum, ita potest esse mater naturaliter, quae non generat naturaliter : quia ad hoc quod sit mater naturaliter,non oportet quod habeat in se nisi dispositiones passivas, ut dictum est, et hoc fuit in Beata Virgine perfecte.

Unde dicit :