36. De Nomine Iesu.

1. Cordi nihil vivacius,
Auri nil tinnibilius,
Ori nil sapit gratius,
Quam Iesus Dei filius.

2. En, magnum nomen Domini,
Quo cordi nihil mundius,
Quo solo salus homini,
Menti nihil iucundius.

3. Est iubilo plenissimum,
Est ori sapor melleus,
Auri melos dulcissimum,
Rancor quo perit felleus.

4. Est nomen tetragrammaton
Sanctum et ineffabile,
Nec dici fas automaton
Nomen hoc admirabile.

5. Est oleum languentibus
Huius dulcedo nominis,
Magnificatum gentibus.
Hinc tota salus hominis.

6. Hoc nomen admirabile
Est datum Christo homini,
Omne genu curvabile
Est huic sancto nomini.

7. Hoc magnum nomen gloriae
Sit nobis benedictio,
Nostrae fixum memoriae,
Non caritatis fictio.

8. Laus, bonitas, potentia,
Honor sit sancto nomini,
Virtus et sapientia
Christo Deo et homini.