38. De Corpore Christi.

1. Ave, viva caro Christi,
Quae in panem te sanxisti,
Nobis cibum te dedisti,
Salva nos, quos sic pavisti.

2. Eja, manna angelorum,
Vitae esca mundanorum,
Pasce nos fomento morum,
Labe pulsa vitiorum.

3. O tu verbum incarnatum,
Ex Maria matre natum
Et pro nobis immolatum,
Nostrum rege vitae statum.

4. Ave, sanguis vere Christi,
Qui de ipso effluxisti
Et a culpis nos lavisti,
Serva nos a nece tristi.

5. Eja, coeli ros et unda,
Corda nostra sitibunda
Aqua vitae fac fecunda
Et ab omni sorde munda.

6. O fons summae pietatis,
Sitienti praebe gratis
Potum tuae caritatis,
Qui conjungat nos beatis.

7. Ave, Jesu flagellate,
Spinis, hasta vulnerate,
Crucifixe, morti date,
Sic salvati sumus a te.

8. Ad inferna descendisti
Et nos inde redemisti,
Jube nos nunc, quos juvisti,
In aeterna vita sisti.

9. Praesta, Christe, qui in cruce
Morte nos salvisti truce,
Ut vivamus Me te duce
Et fruamur coeli luce.