37. In Epiphania Domini.

1. Oriente oriens

Stella nova claruit,
Ex Iacob egrediens

Lucifer emicuit,
Balaam praesagiens

Ut olim edocuit.

2. Auctor saecli nascitur
Saeculorum vespere,

A magis agnoscitur
Artifex in opere,

Adorandus creditur
Unus trino munere.

3. In ture divinitas,

In auro dominium,

In murra mortalitas
Et carnis supplicium,

Et haec tria caritas
Offerat fidelium.