39. De Sanguine Christi.

1. Ave, sacer Christi sanguis,
Contra virus diri anguis

Fusus in antidotum;
Hic me sana te bibentem,
Post excusa facientem

De talento computum.
2. Ave, sanguis vere potus,
Cujus haustu grex devotus

Debriatus sobrie;
In adversis hilarescit,
Ictus referire nescit

Immemor injuriae.
3. Ave, sanguis, fons dulcoris,
De fossato salvatoris

Horto mentis influens,
Cujus penetrans profunda,
Ejus potans sitibunda,

Ejus foeda diluens.
4. Ave, liquor blandae vitis,
Aestum amorosae sitis

Dulciter refrigerans,
Qua gravatur mens pudica,
Sponsi soror et amica,

Ad coronam properans.

5. Ave, sanguis, qui per venas
Sponsi ductus sponsae genas

Ornans facis roseas,
Quando pavida pudore
Candet, rutilat amore,

Voces edit melleas.
6. Ave, sanguis uvae passae,
Quam potantes mentes lassae

Confortantur plurimum ;
Quid hoc mirum, cum sis vinum
Cyprinum et Engaddinum,

Mustum meracissimum.
7. Ave, calix salutaris,
Qui carissimis servaris,

Ut potantes ebrii
Fiant Christi caritate,
Ponderosi castitate,

Parcitate sobrii.
8. Ave, sanguis agni mitis
Quo mens Iota Sunamitis

Fit de nigra candida,
Velut Hesther adornatur,
Plus quam Rachel adamatur

Culpis ante sordida.