Prima Quinquagena.

1. Ave, virgo, lignum mite,
Quae dedisti fructum vitae

Saluti fidelium,
Genuisti Christum Iesum,
Sed pudoris non est laesum
Nec defluxit folium.

2. Ave, virgo, stella maris,
Disciplina salutaris,

Nos emunda vitio,
Te permittas apprehendi
Per exemplum te sequendi,

Ne nos tangat ultio.

3. Ave, nostri salus morbi,
Per quam vita datur orbi

Nato Dei filio,
Per quam hostis ars confusa
Et in plebem est effusa

Dei benedictio.

4. Ave, virgo, fons signatus,
Quem signavit Christus natus

Vultus sui lumine,
Dum in ortu creatoris
Stat illaesus flos pudoris

Obumbrante flamine.

5. Ave, domus castitatis.
Templum purum sanctitatis,

Dei plena gratia,
Nostram offer Christo precem,
Nostri cordis purga faecem
Delictorum venia.

6. Ave, virgo, caeli scala,
Fraudes hostis, mundi mala,

Pugnam carnis reprime,
Confundantur, erubescant,
Conturbentur et tabescant

Omnes hostes animae.

7. Ave, cuius cor lustravit,
Cuius alvum consecravit

Superna dignatio,
Cuius renes, cuius caro
Nil hauserunt ex amaro

Peccati contagio.

8. Ave, luna, quam fundavit
Sol, qui mundum visitavit

Apparens hominibus.
Cum est nostri recordatus,
Paulo minus minoratus
A supernis civibus.

9. Ave, virgo, Dei thronus,
In quo sedet solus bonus,

Qui non habet similem,
Qui perfecit meam causam,
Dum per portam exit clausam.

Carnem sumens fragilem.

10. Ave, Dei templum sanctum,
Peccatoris audi planctum

Et cordis suspiria,
Dei caelum, Dei sedes,
Duc et rege nostros pedes

Ad caeli sedilia.

11. Ave, clara lux diei,
Casta cella verbi Dei,

Salutis fiducia,
Quam probavit ut talentum
Et purgavit ut argentum

Septiformis gratia.

12. Ave, lumen populorum,
Per quam dies angelorum

Nostris fulsit oculis,
Ut oppressis somno mortis
Et ignaris verae sortis

Subveniret populis.

13. Ave, de qua lux est nata
Et de Sion salus data

Captivato populo,
Quae salutem Israelis
Ad effamen Gabrielis

Concepisti saeculo.

14. Ave, virgo, mons electus,
In quo Deus carne tectus

Elegit quiescere,
Qui nec dolum unquam egit,
Nec pudoris claustra fregit,
Cum te fecit parere.

15. Ave, vitae via tuta,
Per quam mihi restituta

Lucis est hereditas,
Per te servum sibi carum
Et heredem me praeclarum

Dei fecit bonitas.

16. Ave, carnis labe carens,
Ante Deum nunc apparens

Cum omni iustitia,
Fructus eius, quem dedisti,
Panis eius, quem pavisti,

Satiaris gloria.

17. Ave, quam sol illustravit,
Cui se Deus inclinavit

In hoc mundi vespere,
Ad quam missus de sublimi
De te carnem vilis limi

Non contempsit sumere.

18. Ave, sponsa, de qua sponsus
Tamquam nube sol absconsus

Deus noster prodiit,
Qui de summis est egressus
Et ad summum est regressus,

Cum ad patrem rediit.

19. Ave, cuius salutari
Nos debemus gratulari,

Qui salvari credimus,
Salva, rege et nos audi,
Qua in die tuae .laudi

Precantes assistimus.

20. Ave, virgo, quam invenit
Puram Deus et praevenit

Benedictionibus,
Cuius pater caput cinxit
Et ornavit et distinxit

Virtutum lapidibus.

21. Ave, mundi flos immundi,
Terra parens vermis mundi,

Nati sine coitu,
Qui est factus vir dolorum,
Proba passus Iudaeorum
In hoc carnis habitu.

22. Ave, virgo, fructu cuius
Et sapore fructus huius

Recreatur populus,
Facta virga florem dando,
Mortem hostis effugando

Facta tamquam baculus.

23. Ave, virgo, quem quaesisti,
Deum ex te protulisti

Sine carnis macula,
Qui rex potens, Deus fortis,
Expugnavit regem mortis

Nostra solvens vincula.

24. Ave, cuius mihi pias
Pius Deus stravit vias

Suam docens semitam,
Qui te rexit dirigendo,
Qui direxit te regendo

Per virtutum orbitam.

25. Ave, domas creatoris,

Quam ornavit lux splendoris,

Rex virtutum, gloria,
Hoc in loco, quem paravit,
Sponsus tuus habitavit

Ut in domo propria.

26. Ave, virgo, pro me roga,
Te produxit synagoga
Sicut spina lilium,
Dereliquit te Iudaeus,
Et assumpsit sponsus Deus
In throni consortium.

27. Ave, virgo, spes lugentis,
Cuius caro parientis

Post partum refloruit,
Castitatem es professa,
Voluntate es confessa

Sponso, qui te voluit.

28. Ave, cuius supra sinum
Reges regem tres divinum

Adorarunt mystice,
Attulerunt tria terno:
Aurum regi, tus aeterno,

Murram carni lubricae.

29. Ave, sidus matutinum,

Fletum tergens vespertinum

Luce tui muneris,
Nox praecessit tuum ortum,
Mane clarum est exortum,
Dum mundum ingrederis.

30. Ave, bonis insignita,
Summi regis urbs munita
Contra nequam spiritus,
Soli patens creatori,
Sed maligno tentatori
Nullos praebens aditus.

31. Ave, flentis consolamen,
Laborantis recreamen,

Dolentis solacium,
Hostes mei ne me fallant,
Qui me tota die vallant,

Meum sis refugium

32. Ave, verbi summi mater,
Per quod caelos fecit pater

Cum virtute spiritus,
De te carnem sumpsit unus,
Tres sunt tamen illud munus

Operati caelitus.

33. Ave, virgo, quae sensisti,
Quae gustasti, quae vidisti,
Quam dulcis sit Dominus,
Quae Agebas eius ori
Super favum dulciori
Labra tua comminus.

34. Ave, virgo, me defende,
Arma, scutum apprehende

Contra malos homines,
Cedant hostes tuis minis,
Fiant omnes tamquam cinis

Ante venti turbines.

35. Ave, sacrum vitae flumen,
Paradisi purum lumen,

Nos clementer respice,
Intra domum ubertatis
Nos torrente voluptatis

Abundanter refice.

36. Ave, rosa, princeps florum,
Cuius fulgur meritorum

Fulget ut meridies,
Ultra solem est serena,
Ultra florem est amoena

Tuitus tui species.

37. Ave, cuius umbilicus
Fuit castus et pudicus

Nec sensit illecebras,
Lumbis meis castitatem,
Carnis praesta sanitatem,

Mentis fuga tenebras.

38. Ave, dives arca Christi,
Quae thesaurum effudisti,

Quo ditantur omnia.
Quem exspecto, qui delinquo,
Placa mihi Deum, in quo

Mea est fiducia.

39. Ave, per quam lex infausta
Sua perdit holocausta,

Regum perit unctio,
Ut pro nobis se litaret,
De te natus rex apparet

Dicens: ecce, venio.
40. Ave, martyr passa mente,
Dum salvator te vidente

Dormivit in tumulo,
Ferro magis te pungebat
Dolor eius, quem vendebat

Falso Iudas osculo.

41. Ave, virgo, me conserva,
Qui draconis vi proterva

Conturbor assidue,
Qui peccatis semper premor,
Ut sim tui semper memor,

Dulcis mater, annue:
42. Ave, per quam ad nos misit
Lucem suam, qua invisit

Deus illud saeculum,
Tu mons sanctus appellaris,
Tu dilectum nominans

Eius tabernaculum.
43. Ave, sponsa summi regis,
Qui pro vita sui gregis

Sese nobis contulit,
Dum salutes mandat maestis
Per salutem, quam caelestis

Paranymphus attulit.

44. Ave, parens, nati nata,
Quae in veste deaurata

Nitens ante Dominum
Praeis omnes cum corona,
Te sequuntur fronte prona

Coetus omnes virginum.

45. Ave, quam fons sanctus lavit,
Sancto cuius habitavit

Deus tabernaculo,
Per te vivit homo reus,
Quem audivit homo-deus

Natus in diluculo.
46. Ave, virgo, quam elegit
In heredem, qui nos regit,

Rex perennis gloriae,
Quam dilexit mundus mundam
Ut puellam verecundam

Pro virtutum specie.
47. Ave, Sion specialis,

Mons excelsus, urbs regalis,

Digna Christum parere,
Quem suscepit senex iustus,
Portans onus non onustus,

Portatus ab onere.
48. Ave, cuius adiumento

Sum redemptus a tormento

Potestatis inferae,
Cum maiestas increata,
Per te nobis incarnata,

Me venit assumere.
49. Ave, nutrix ducis magni,
Qui ad instar venit agni

Pius, mitis, patiens,
Qui cum flammis est venturus
Fortis vindex, iudex durus

Et potenter puniens.
50. Ave, tuae prolis opus,
In qua cedrus fit hysopus,

Cum fit caro deitas,
Qui aspersam te mundavit
Et te lotam dealbavit,

O pura virginitas.