39. Hymnus de Conceptione B. M. V.

1. Tu concepta sanctitate
Es, virgo, sine vitio,
Puritate, caritate
Creata a principio,
Tu formata claritate
A Deo potentissimo.

2. Divinitus conceptio

Fuit Mariae virginis "
Supernaque provisio,
Ut esset lumen luminis
Virtutisque perfectio
Iam ad salutem hominis.

3. Tu purissima concepta
Sine carnis voluptate,
Tu a Deo iam electa
Venisti a trinitate,
Tu prae cunctis es perfecta
Salus in humanitate.

4. Nostrae iam redemptionis
Fuisti tu principium
Nostraeque salvationis
Fuisti tu indicium,
Causa es perfectionis,
Ut vitaremus vitium.

5. Tu, virgo, fructum faciens,
Quo erimus in gaudio,
Tu, virgo, Deum pariens,
Quo erimus in lavacro,
Es inimicum deprimens,
Qui nos percussit gladio.

6. Omnes cantemus iubiles
Conceptione virginis,
Cuncti psallamus vigiles,
Nam venit salus hominis,
Ipsam laudemus humiles,
Ipsa succurrit deviis.

7 , Fuit in te puritas,
Grataque sanctitudo,
Humilitas, virginitas,
Odor, lumen, pulchritudo,
Fuit in te caritas,
Castitasque claritudo.

8. Tu fructum salutiferum
Concipiensque pariens,
Fugasti tu mortiferum,
Tu vitam nobis tribuens,
Tu mediatrix hominum,
Per te donatur requies.

9. Laetemur hoc principio
Nos de Maria virgine,
Nam erimus in gaudio,
Et erit lux in homine,
Haec virginis conceptio
Dat vitam mari, feminae.

10. Virgo pulchraque decora,
Tu filia Ierusalem,
Te laudabo omni hora,
Me iuva servum debilem,
Nullus homo sit in mora,
Sed te salutet humilem.

11. Tu quasi summum balsamum
Infirmos cunctos liberans,
Tu salutare optimum
Nos in odore fumigans,
Tu argumentum validum
Nos mortuos vivificans.

12. Tua mater sancta Anna
Nam te Mariam peperit,
Tu es gratiosa, magna,
Nam Deus tibi tribuit,
Tu suavitatis manna,
Et Ioachim te genuit.