40. Oratio sub Elevatione dicenda.

1. En, Christe, genu flectimus,
En tibi palmas pandimus,
Constanter in te credimus,
Quem dubitavit Didimus.

2. Clavi locum non vidimus,
Latus tuum non sensimus,
In te tamen confidimus,
Quod promisisti, petimus.

3. Jesu, Judas quem prodidit,
Judaea gens quem perdidit,
Quem sputa, clavi, lancea
Risusque, vasa fellea,

4. Quem spina pungens, alapae,
Vach clamitantes satrapae
Affecerunt et verbera,
Arundo, mors, crux aspera.

5. Per, Jesu, quinque vulnera,
Quae tua tulit tenera
Caro, carne nos misera
Duc exsules ad supera.