40.

1. Nunc adsit nobis spiritus
Omnipotentis coelitus,
Qui nos laudare penitus
Filium Dei doceat,
Nos caritate repleat,
Ut nostra mens sic ardeat.
2. Corda laetentur omnium,
Mens gaudeat fidelium,
Maria parit filium,
Divinum unigenitum,
Qui nobis dedit aditum
Per Adam coeli perditum.
3. Lux corde rectis oritur,
Nam mors antiqua moritur,
Nostra salus reducitur.
Praeconia prophetica
Replentur et Davidica,
O Christe, nos salvifica.
4. O Christe, nobis gratiam,
Aeternam quoque gloriam,
Tu da fidelem latriam.
Maria, virgo virginum,
Quae sola spes es hominum,
Pro nobis ora Dominum.

5. Nunc omnes consolamini

Et intime laetamini,

Ab invicem amamini,
Nam puer nobis nascitur
Et in praesepe ponitur,
Qui verus Deus noscitur.
6. Jam corde sursum tendite,

Quod factum est, perpendite

Et regi nato psallite;

Nam stella, quam promiserat

Balaam, ita fulserat

Et mundum illustraverat.

7. O sancti Dei, jugiter

Orate Deum pariter,

Ut nobis det suaviter,
Hic condecenter vivere
Possimus, mala fugere
Ipsumque semper cernere.
8. Jerusalem nunc gaudeat,

Cum speciosus exeat

Ex Sion, cujus luceat
Jam lux illustrans Israel
Et austrum fugans Jezabel,
Est dictus hic Emanuel.

9. O Sion, solve vincula,
Bibe salutis pocula,
Jam auferuntur jacula,
Evae peccatum veteris,
Tu gratis nunc redimeris,
Per Dominum eligeris.