Sermo VI.

Item, sermo fratris Bonaventurae editus eadem Dominica tertia de Adventu Parisius, coram Fratribus in Capitulo.

Dirigite viam Domini, Ioannis primo .

Dominus noster Iesus Christus, qui dignatus est venire in mundum sicut fons claritatis aeternae, sicut imago bonitatis paternae, sicut speculum et regula salutis humanae, ipse nostros intellectus illustret nostros affectus informet, nostros sermones et actus componat et ordinet, ut possimus ad laudem suam etc.

Dirigite viam Domini; sumtum de Isaiae quadragesimo . Quicumque vult devote et digne Domini Iesu Nativitatem proximam celebrare, secundum hanc praedicationem venerabilis praecursoris Baptistae Ioannis dirigat viam Dei aeterni ad se et ad animam suam per ista quatuor, scilicet per universalis impuritatis expurgationem; Ieremiae trigesimo primo: Statue tibi speculam, pone tibi amaritudines, dirige cor tuum in viam rectam.

Per universalis pietatis assumti onem; Genesis vigesimo quarto: Mittet Angelum suum tecum et diriget viam tuam.

Per universalis sanctitatis conversationem; Proverbiorum vigesimo tertio : Audi , fili mi , et esto sapiens et dirige in via animum tuum; Proverbiorum decimo quinto:: Vir prudens dirigit gressus su os.

Per universalis salutis promotionem; Psalmus : Utinam dirigantur viae meae ad custodiendas iustificationes tuas ! Ieremiae decimo: Scio, Domine, quia non est hominis via eius, nec viri est, ut ambulet et dirigat gressus suos; Proverbiorum quarto: Dirige semitam pedibus tuis, et omnes viae tuae stabilientur.