42. De Incarnatione Christi secundum alphabetum.

1. Amor verus omnia

Potest superare,
Bellorum saevitiam

Valet, refrenare,
Corda discordantium

Sic coadunare,
Duorum mentes hominum

simul concordare,
Ergo salvare

qui se vult, discat amare.

2. Factorem hic omnium

amor inclinavit,
Grandem parvum fieri

auctor procuravit,
Has inter miserias

ipsum collocavit,
In patris qui dextera

cuncta gubernavit,
Katholicos lavit

a crimine, quos adamavit.

3. Lubrica se voluit

indui natura,
Mundanae qui machinae

solus tenet iura,
Nec non cuius regitur

caelum praelatura,
Orbis factor carnea

tegitur figura,
Patris qui pura

tamen ante fuit genitura.

4. Quem non potest ambitus

claudere caelorum,
Re miranda gignitur

praeter viri thorum,
Stricto loco ponitur

princeps angelorum,
Tamen erit inscia

omnium dolorum
Virgo, flos florum,

pariens dominum dominorum.

5. Xristus hanc mortalibus

prae cunctis elegit,
Ymmo, quos creaverat,

cunctis praeelegit,
Zyma hostis tollitur.

quo mundum subegit,
Et eius potentia,

per quam nos abegit,
Commiserans fregit

Christus nos atque redegit.