41.

1. Haec est dies salutaris,
In qua nobis stella maris
Dat gaudere
Nec habere

Terminum,
Qui cantemus
Et laudemus
Dominum.

2. Splendor namque deitatis,
Fons totius bonitatis,
Gloriosam
Et formosam

Virginem
Fecundavit
Et salvavit
Hominem.

3. Factum caro Dei verbum
Frangens, quidquid est super-
bum,
Dum descendit,
Praeostendit

Aliis

Ut a rege

Data lege

Filiis.

4. Admiratur virgo pia,
Per quam patet vitae via,
Gabrielem
Tam fidelem
Nuntium,
Quae concepit
Et peperit
Filium.

5. Veneremur regem natum,
Super coelos sublimatum,
Per virtutem
Ad salutem
Omnium
Det nostrorum
Peccatorum
Veniam.

41a.

1. Haec est dies salutaris,
In qua nobis stella maris
Dat gaudere
Nec habere

Terminum,
Hinc cantemus
Et laudemus
Dominum.

2. Admiratur virgo pia,
Per quam patet vitae via,
Gabrielem
Tam fidelem
Nuntium,
Quae suscepit
Et concepit
Filium.

3. Splendor namque trinitatis,
Fons totius bonitatis,
Carnem vilem
Ac servilem

Induit,
Quem majestas
Et honestas
Praebuit.

4. Visitavit mundum Deus,
Ne periret homo reus,
Gloriosam,
Tam formosam

Virginem,
Decoratam
Ac ornatam
Domino.

4:3.

1. Pater filiae

Nasci dignatur hodie

De filia,
Sacra virgine,
Non ex virili semine,

Fit nescia
2. Res mirabilis

Et laudanda mirabilis

Potentia,
Contra solitum,
Contra naturae debitum

Cum gratia.
3. Virgo peperit,
Divina sicut voluit

Clementia,
Puer gignitur,
Nec ulla mater premitur

Angustia.
4. Hostis perfidus

Et invidus et callidus

Ad vitia,
Qui se perditum
Adamque vidit positum

In gloria,
5. Fraudis machina

Temptat rem levem, feminam,

Ad talia:
Si comeditis
De pomis hic appositis

In media,
6. Dii eritis

Scientes, Deo similes

Per omnia,

Et qui vetuit,
Haec sola prohibuit

Invidia.
7. Eva facinus

Audens et prava protinus

Consilia
Viro suggerit,
Maligna jussa praeterit

Regalia.
8. Pomo vescitur,

Videns se nudum tegitur

Per folia,
Hinc decipitur
Et decipit, hinc nascitur

Miseria.
9. Hic mox cecidit
Et data justa perdidit

Palatia,
Nos contraximus
Peccatum et recepimus

Similia.
10. Porta clauditur,
Angelica praeponitur

Custodia,
Nullus noverat
Et evitare poterat

Supplicia.
11. Sed, qui potuit,
Nobis solus aperuit

Coelestia,
Mittens filium,
Per quem fit privilegium,

Ad gaudia.

12. Hinc concinere

Est et nova psallere
Laetitia.