Sermo VII .

Item, sermo fratris Bonaventurae editus eadem Dominica tertia Lugduni in ecclesia sancti Nicetii, coram populo et clero.

Ego baptizo in aqua , medius autem vestrum stetit, quem vos nescitis, Ioannis primo .

In verbis his nobilis Christi Praecursor tria facit. Primo exprimit suam humilitatem profundam, ibi: Ego baptizo in aqua; secundo, Verbi incarnati fidelitatem sinceram, cum addit: medius autem vestrum stetit; tertio, Iudaeorum negligentiam omni mundo notam, ibi: quem vos nescitis.

Omisso autem, quomodo Ioannes baptizavit in aqua, sciendum, quod Verbum incarnatum fuit et est medius nostrum tripliciter. Nam fuit medium colligantiae mirae in incarnatione, in qua iunctum ultimum cum primo, humana scilicet natura cum divina; Deuteronomii quinto : Ego sequester et medius fui inter Dominum et vos.

Disciplinae sanctae in conversatione, in qua iunctum est honestum cum vero, sanctitas scilicet vitae cum veritate doctrinae; Lucae vigesimo secundo : Ego autem in medio vestrum sum, sicut qui ministrat.

Influentiae vitae in passione, in qua iunctum est infimum cum supremo infirmitas scilicet nostra divinae virtuti coniuncta; Ioannis decimo nono : Crucifi xerunt eum , et cum eo alios duos hinc et hinc, medium autem Iesum, quasi influentiae divinae mediatorem ad animas.

Sciendum etiam, quod Iudaeorum ignorantia, sicut et quorundam Christianorum, causabatur, sicut et hodie causatur, a defectu illuminationis internae, ad quam se non disponebant; Psalmus : Nescierunt neque intellexerunt, in tenebris ambulant.

Ab obstaculo argumentationis mundanae, per quam recalcitrabant; Baruch tertio : Filii Agar, qui exquirunt prudentiam, quae de terra est, negotiatores Merrhae et Theman et fabulatores et exquisitores prudentiae et intelligentiae; viam autem sapientiae nescierunt.

Ab odio aemulationis invidae, cui insistebant; primae Ioannis secundo : Qui odit fratrem suum in tenebris est et in tenebris ambulat et nescii, quo eat etc.