40. In Conceptione BMV.

1. Mater regis summi,
Dei filia,
hodie Maria
mire concepta.

2 a. Ave, porta clausa,
ex stirpe David
et radice Iesse
egressa,

contra naturalem
decursum parta.

2 b. Tu vellus Gedeonis,
Samsonis robur,
decus Absalonis,
praecellis
in modum totum,
quod capit orbis.

3 a. IIaec nubes lenis,
super quam

scandens Dominus Aegyptum
est ingressus,
ut commoverentur
idola a facie eius.

3 b. Eva oboedivit
serpenti,

cuius caput contrivit virga
haec Aaron,
arida quae florem
genuit teste propheta.

4 a. Ut virgula fumi

per desertum ascendit

ex murrae et turis

aromatibus

ac universi pulveris

pigmentarii.

4 b. Stella maris, hortus

conclusus, quam Dominus
ab aeterno possedit
et ex antiquis,
antequam terra fieret,
ordinavit.

5 a. Historia probat

Anglicana, quod festum istud

conceptionis

miraculose est iussum

celebrari

sexto Idus mensis Decembris,

ut, qui praecepit

honorare parentes, suam pro

toto honoraret matrem.

5 b. Uirtutum cuius odor
aromata super omnia,
virgo Maria,

in et ante et post partum
inviolata

permansisti; sic, ut te
figuraret typo,

rubus quondam apparens Moysi
permanserat incombustus.

6 a. Malum Dominus
per te convertit
in Israel

atque omne auferens
stannum excoxit
ad purum, scoriam omnem
et primae parentis
compurgavit rubiginem

6 b. Mundus qua vere
totus nigratus
fuit, tua

conceptione sancta,
quae omni caret
originalis maculae
ruga; quod determinat
synodus Basileae sacra.

7 a. Eia, nos,

advocata nostra,
exaudi clementer:

7 b. Labem

peccati quod tollat,
natum ora frequenter,

8. Lumbosque praecingat
amore tuae conceptionis
ac suae passionis merito
nobis misereri
dignetur miseris.