39. In Resurrectione Domini.

R. Cedit frigus hiemale,
Redit tempus aestivale,
Iuventus laetatur.

1. Ecce, tempus est vernale,

Quo per lignum triumphale,

Inter ligna nullum tale,

Genus hominum mortale

Morte liberatur.

2. Iudaeorum turba duce
Nucleus exit de nuce,
Nudus ponitur in cruce,
Terra tremit, et sol luce
Propria privatur.

3. Accusatur, condemnatur,

Ligatur et flagellatur,

Aceto, felle potatur,

Opprobriis saturatur,

Spinis coronatur.

4. Gens Iudaea, "crucifige",
Clamans " tormentis adfige,
Per membra clavos infige";
Adam Averni de Styge
Extractus laetatur.

5. Gaude, plebs religionis,
Dies resurrectionis
Instat, novis plaude sonis,
Expende tempus in bonis,
Dum spatium datur.