Sermo VIII .

Item, sermo fratris Bonaventurae editus coram rege Franciae et tota familia.

Et pax Dei, quae exsuperat omnem sensum, custodiat corda vestra et intelligentiae vestrae in Christo Iesu, ad Philippenses quarto .

Duo facit hic Apostolus, divina pace et suavitate et tranquillitate repletus. Primo ostendit pacifluae Divinitatis transcendentem excellentiam, ab omnibus venerandam et desiderandam; secundo eandem exprimit et optat affective universis tanquam universaliter necessariam.

Circa totum notandum, quod quicumque vult habere ad custodiam sui cordis et intelligere istam pacem, quae Deus est et quae Dei paradisus est et quae requies et salus mentis est, oportet, quod convertat animam suam ad interiora universaliter; Isaiae quinquagesimo septimo : Veniat pax, requiescat in cubili suo.

Expandat se super cuncta inferiora potenter; ad Romanos decimo sexto : Deus autem pacis conterat satanam sub pedibus vestris velociter.

Transformetur in sublimia desideria glorianter; Isaiae vigesimo sexto : Domine, itabis pacem nobis, omnia enim opera nostra operatus es nobis; et ibi: Anima mea desideravit te in nocte. Nomen tuum et memoriale tuum in desiderio animae.

In admiratione se constituat super caelestia et aeterna sapienter; ad Hebraeos ultimo : Deus autem pacis, qui eduxit de mortuis pastorem magnum ovium in sanguine testamenti aeterni, Dominum nostrum Iesum Christum, aptet vos in omni bono, ut faciatis eius voluntatem.