41. In Conceptione BMV.

1 a. Die, qua concepta
Beata Maria,
In alvo recepta,
Magna laetitia
Tantae originis.

1b. Accurrant maiores,
Accedant infantes,
Veniant minores
Simul et lactantes
Ad laudem virginis.

2 a. Quot terrae gramina,
Quot caeli sidera,
Arborum germina,
Tot tua munera,

Quot sunt campi flores.

2 b. Tot sunt tuae laudes,

Quot vox nequit fari,
Tot ta caelis gaudes,
Quot pisces in mari,
Quot pardis colores.

3 a. De radice Iesse

Ut rosa de spinis
Virga cepit esse,
De fructu germinis
Natura miratur.

3 b. Virgo cum pudore
Casto concipitur.
Cristallus calore
Solis non solvitur,
Virtute probatur.

4 a. Vellus Gedeonis

Caeli trahens rorem,
Templum Salomonis
Dans cunctis decorem,
Consurgens aurora,

4 b. Conceptura prolem
Nova genitura,
Novum stella solem
Fructum paritura
Est virgo decora.

5 a. Nisi concepturam

Propheta vidisset,
Nunquam parituram
Virginem dixisset
Circum dando virum.

5 b. Rubus, hortus, porta
Et abscissus lapis,
Per quam lux est orta;
Non, quod dico, capis,
Quod est cunctis mirum.

6 a. Est rex Assuerus

Et Hester Iudaea
Iudaeis severus
Et Iudith Hebraea,
Hostem iugulavit ;

6 b. Pulchra Sunamitis,

Quae David servivit,
Illa Rahel mitis,
Quae caput contrivit
Et fortem prostravit.

7 a. Generat puella

Suum genitorem,
Iacob micans stella,
Portans portitorem,
A quo portabatur.

7 b. Per hunc factus mundus,
Quem lactat ubere,
Leve portat pondus,
Ut in itinere
Virginis monstratur.

8 a. Rege nostram navem,
Stella matutina,
Da portum suavem,
Ne nox vespertina
Obruat procellis ;

8 b. Detur securitas,

Ubi laus perennis,
Assit felicitas
Et dies sollennis
Permanens in caelis.