44. De Incarnatione Domini.

1. Intacta viscera

Pudicae virginis
Fuderunt foedera

Dei et hominis,
Paterna dextera,

Virtute numinis
Exemit scelera

Primaevi criminis.

2. Pudoris lilium

Matris intemerae
Tonantis filium

Traxit ab aethere,
Mirum commercium,

Divino munere
Init consortium

Dives cum paupere.

3. Misericordiae

Obvia veritas,
Cedit laetitiae

Legis asperitas,
Stat locus veniae,

Cadit impietas,
Dum regem gloriae

Parit virginitas.

4. Moysi virgula

Draconem induit,
Mutata formula

Virgam abhorruit,
Carnis umbracula

Verae dum coluit,
Mundi piacula

Deus absorbuit.

5. Hic serpens dicitur

Legis abiectio,
Dum prelo premitur,

Iam cessat unctio
Et dux deprimitur,

Patet consumptio,
Iudaea feritur,

Et furit ultio.

6. Hamus subtegitur

In carnis tegmine,
Captivans capitur

Satis certamine,
Qui morsum tribuit

Letalem feminae,
Morte succubuit

Vincente virgine.

7. In testa lutea

Lumen absconditur,
Ablata decima

Dragma requiritur,
Iam fraus viperea

Arte refellitur,
Imis aetherea

Pax dia redditur.

8. Cognosce Dominum,

Iudaea misera,
Rectorem luminum

Veste sub altera,
Legi dat terminum,

Quem docet litera,
Ad novum gaudium

Recedunt vetera