44.

1. Puer est nobis natus,
Dum Deus humanatus
Non carnis, sed reatus
Est onus dedignatus.
Qui genitus
Divinitus

Et patri coaequalis,
Dum nascitur
Exceditur

Lex partus naturalis.
Nam incarnari sustinens

De virgine procedit,
Et deitatem retinens
A patre non recedit.

2. Quos Adam deformavit,

Nos Christus reformavit,

Qui coelos inclinavit

Et tenebras calcavit.

Nam pristinae

Caligine

Demersos vetustatis
Nos extulit
Et retulit

Ad lucem veritatis.
Nascens mundo consuluit

Et plebi periturae

Et humanam praeposuit

Angelicae naturae.

3. Qui coelo delegatur,
In terris conversatur,
Cui coelum famulatur,
Praesepi reclinatur.
Hunc sideris
Prae ceteris

Lux micans praesignavit,
Hic canticis
Angelicis

Pastores excitavit ;
Ipsi laus in coelestibus

Et gloria cantatur,

In terra pax hominibus

De coelo nuntiatur.