44. In Memoria ss. Hermelanui et Baldi.

In 1. Vesperis.

Ad Magnificat.

A. O Christo plebs dedita,

Sanctorum glebis praedita,

Gratuleris hodie,

Tota sis iucunda;

Erumpens in laudibus

Sursum erectis cordibus

Lauda regem gloriae

Labe mente munda.

Spem fide corrobora,

Ecce, sanctorum corpora

Hermelandi Baldique

Tibi commendantur ;

Votis ergo sedulis,

Dignis concentus modulis

A nobis nunc utrique

Laudes referantur.

Ad Matutinum.

Invitatorium.

Sinceris Christo mentibus

Exsultemus cum gaudio,

Qui sanctorum pignoribus

Nos honorat in stadio.

In 1. Nocturno.

Antiphonae.

1. Laus litetur in sanctorum

Festo grata numini,

Nam in lege Domini

Fuit voluntas eorum.

2. Super Sion constituti

Montem sanctum Domini

Sunt honoris gemini

Serta tandem assecuti.

3. A fructu multiplicati

Caelestis pinguedinis

Dei vultus luminis

Claritate sunt signati.

Responsoria.

1. Lux, ecce, fulget hodie

Novae sollemnitatis,

Laudum Utentur hostiae

In ara puritatis,

Ne sanctorum reliquiae

Auferantur ingratis.

V. Psallat huius ecclesiae

Chorus pro tantis gratiae

Donis sibi collatis.

2. Mundum ad agni nuptias

Invitans rex caelorum

Servos praemittit varias

Promittens post laborum

Cursum vitae delicias

Mercedem meritorum.

V. Horum sancti, nunc proprias

Quorum colis exuvias,

Typum tenent servorum.

3. Cultu laudum impendia

Sacrae devotionis

Prome, praeseus ecclesia,

Paradisi colonis,

Quorum fulges praesentia

Congaudesque patronis,

V. Laudes eorum amplia

Vitae compescens vitia

Filiae Babylonis.

In 2. Nocturno.

Antiphonae.

1. Intraverunt Dei templum,

Ut orarent timidi,

Cunctis zelo fervidi

Praebentes exemplum.

2. Hoste strato cum dulcore

Praeventrice gratia

Viri sancti gloria

Coronantur et honore.

3. Sui semper procedebant

In conspectu Domini

Et idcirco termini

Lapsum prorsus eludebant.

In 3. Nocturno.

Antiphonae.

1. Deum quaerens sine sorde

Haec est generatio,

Manus eius officio

Innocens et mundo corde.

2. Beati, remissae quorum

Erunt culpae penitus,

Illi nempe caelitus

Sorte fruentur iustorum.

3. Exaudiri meruerunt

Clamantes ad Dominum,

Quia spei terminum

Suae Christum posuerunt.

Responsoria.

1. Assunt nobis celebria

Beatorum sollemnia

Hermelandi Baldique,

Digna laudum praeconia

Devote cum laetitia

Referamus utrique,

V. Ut horum prece praevia

Christi remittat gratia,

Quae gessimus inique.

2. Clara sanctoram merita

Signa praemonstrant inclita,

Nam ipsorum obtentu

De caelo datur pluvia,

Fugatur aegrimonia

Sanitatis adventu.

V. Restaurantur deperdita,

Languorum cessant taedia,

Pulsi morbi detentu.

3. Te, Christe, laudant supera,

Terra, pontus et cetera,

Quaecunque condidisti,

Qui tot in vitae vespera

Nobis sanctorum pignora

Praeclara contulisti ;

V. Nobis remitte scelera

Tibique nos confoedera,

Christe, quos redemisti.

In Laudibus.

Antiphonae.

1. Sanctorum testimonia,

Sacris quorum pignoribus

Praesens splendet ecclesia,

Facta sunt credibilia.

2. Nostra nunc terra iubilet

Laetanter illis serviens,

Laudum sonis invigilet

Festum sollemne faciens.

3. Ad te, Christe, pervigiles

Exstiterunt de luce,

Carnem ut firmi pugiles

Domantes multa cruce.

4. Cunctorum universitas

Christo confiteatur,

Per quem nostra nunc parvitas

Tot donis gloriatur.

5. Exuti carnis carie

Deum laudant in caelis,

In laude quorum hodie

Resultet nostra chelys.

In 2. Vesperis.

Super Magnificat.

A. O Iesu, fidelium

Spes et gloriatio,

Per quem tot magnalium

Haec aula deposito

Digne gloriatur,

Firma fides mentium

Crescat et dilectio,

Da spectatum gaudium,

Quo pro vitae merito

Te dante fruatur.