45. De Incarnatione Domini.

1. Patris unigenitus,
Ante solem genitus,
Nutu sancti spiritus
Alvo matris editus,
Vagit cunis positus,
Praesaepi reconditus ;

Sic accepit plebs inanis
Missum manna caelitus,

Sic de caelo vivus panis
Venit mundo deditus.

2 a. Servi formam induit,
Servi qui nil habuit.
Sed, quae Deum genuit,
Virum non sustinuit,
Nec flos pudoris marcuit,
Messias quem aperuit;

Sic in arca testamenti,
Sicca virga floruit,

Sic in terra sitienti
Vellus rore maduit.

2 b. Obstupescat saeculum
Tantum hoc miraculum,
Virgo lactat parvulum,
Quae non novit masculum;
Videtur iam ad oculum
Vetus illud oraculum:

De radice Iesse natum
Flos fecundat surculum,

In quo sanctus habet gratum
Spiritus cubiculum.

3 a. Sublevator pauperum
Et creator siderum
Mundum mole scelerum
Miseratur miserum,
Matris subintrat uterum,
Virgo dat nobis puerum,

Qui secundum Isaiam
Iter planat asperum

Atque mundi monarchiam
Portat super umerum.

3 b. Utitur pro solio
Rex Mariae gremio,
Cuius sub imperio
Vivit omnis natio,
Iam Danielis visio
Non vacat a mysterio:

Lapis enim, qui descendit
De montis fastigio,

Crevit ita, quod transcendit
Terram suo spatio.

4 a. Ut in praeconium

Matris et virginis
Indocti labium

Solvatur hominis,
Praestet ingenium,

Det vim acuminis,
Qui tenet solium

Superni culminis.

4 b. Regii sanguinis

Germen egregium
Decus originis,

Splendor natalium,
Telis cupidinis

Cor tulit obvium,
Ut divi seminis

Esset hospitium.

5 a. Hospita
Fit ita

Deo et homini,

5 b. Inclita
Cognita

Femina nomini.

6 a. Recens hospitium

Cubile nobile,
Vitii nescium,

Virtuti habile,
Ipsius ostium

Fixum, non mobile,
In hoc nil tristium,

Totum risibile.

6 b. O susceptibile,

Prorsus mysterium !
Acceptat fictile

Vas fictor omnium,
Inibi stabile

Regens imperium,
Nullum difficile

Ferens negotium.

7 a. Quae mens, quae schedula

Capere valeat,
Hac de iuvencula

Quod dici deceat?
Cuncta si saecula

Scribere libeat,
Laus erit parvula

Nec fine careat.

7 b. Quae semper floreat,

Haec Iesse virgula,
Rubus, qui vigeat

In flamma sedula,
Quae soli pateat,

Haec portae clausula,
Quae lucem praebeat,

Haec nucis gerula.

8 a. Haec candens lilium,
Haec rosa rubea,
Haec mannae proprium
Vas, urna aurea.

8 b. Haec redeuntium
Ductrix idonea,
Pervenientium
Sollennis laurea.

9 a. Framea
Flammea

Hac refrigerium
Facit,

9 b. Arida
Area

Hac stillicidium
Capit.

10 a. Ovis erronea

Hac caulas parium
Implet,

10 b. Dragma argentea

Per hanc marsupium
Habet.

11. Laus sibi paxque suis.