43. D. s. Gebehardo Constantiensi.

1. Gaudete, iusti,

in Domino hac clara die,

2. Collaudantes

Christum consonis
vocibus et organis,

3. Qui in sanctis
est laudabilis
suis et mirabilis ;

4. Quos glorificat
mira gloria
in terra ac super sidera.

5. Hinc est, hodie
quod veneramur
haec sacrosancta sollemnia

6. Sanctissimi

praesulis Gebehardi,
qui ornat mundi
polique curiam.

7. Hic nobili

stirpe est progenitus,
nobilior sed
refulsit moribus.

8. Quem rex potens
dispensatorem
familiae suae
consulendo praetulit,

9. Ut talentum
sibi collatum
ad usuram daret
nec sub terra tegeret.

10. Quo ditavit multos:

terrendo dure improbos,
rogando leniter subiectos
atque corrigendo ;

11. Dispersit terrena,

ut compararet aeterna,
fundans tibi, Christe, aedem
teque fecit sibi heredem.

12. Pulsanti tibi occurrit
gaudensque te excepit ;

13. Lucernam manu ardentem
invenisti tenentem.

14. Iam tua gaudia intravit,
"Euge, felix" hodie audivit,
cum pecuniam
cum lucro tibi, rex, restituit.

15. Nunc candet inter lilia
ornans sacerdotum agmina,
inter numina
angelica iubilat "Alleluia".

16. Hunc nobis siste fautorem,
te petimus auctorem.