44. Hymnus alius de eadem.

1. Tu, virgo, nobis gaudium
Et tu nobis salutare,
Tu nobis es solacium,
Tu digneris nos salvare,
Nos ducas ad palatium,
Ut possimus id intrare.

2. In te natum lignum vitae,
Id omnia vivificans,
In te humileque mite,
Et tu perdita restaurans,
In te manet virtus rite,
Tu fideles Christi salvans.

3. Beata tua viscera
Portarunt Dei filium,
Beata tua ubera
Lactarunt ipsum lilium,
Mundasti nostra scelera,
Tu cunctis es auxilium.

4. Tu mansueta, humilis,
Et clemens pia[que] mitis,
Tu fructuosa, nobilis
Tuque virtutis [es] vitis,
Et nulla tibi similis
In potentia vel ditis.

5. Populorum advocata
Es pro nobis intercedens,
Tu es memor atque grata
Et benigna seu clemens,
Tu fuisti salutata
Sanctissime concipiens.

6. Tu es nostra mediatrix
Et lux mundi luminosa,
Tu prae cunctis es beatrix
Et tu nimis gratiosa,
Viam es secuta patris,
Tu virtutum generosa.

7. Si nobis tu deficeres,
Haberemur diffidati,
Si recto nos proiceres,
Maneremur condemnati,
Si nobis non assisteres,
Nos essemus debellati.

8. Tu pro nobis, virgo, ora
Et pro nobis intercede,
Christum sanctum tu exora
Nobis gratiam concede,
Ut in nostrae mortis hora
Nos scribamur pro herede.

9. Sanctam Mariam cogita
In omnibus laetitiis,
Sanctam Mariam invoca
In omnibus molestiis,
Sibi Mariae supplica,
Ut iuvet te ab impiis.

10. Ipsa petenti adnuens
Iuvat, clamantes relevat,
Ipsa fideles diligens
Deum pro ipsis rogitat,
Ipsa precantes audiens
Semper, ut prosit, properat.

11. Ceras semper tu in mente
Sanctam Mariam virginem,
Ipsam rogaque attente,
Dat tibi valitudinem,
Non laederis tu repente,
Dat tibi fortitudinem.