46. Cursus de Nativitate Domini.

Die Sabbati.

Ad Matutinum.

1. Tactum pudoris nesciens

Sancto concepit flamine

Maria virgo, pariens

Iesum sine gravamine.

2. Attendite miraculum:

Mater more femineo,

Qui cuncta pascit, parvulum

Lacte fovet virgineo.

3. Hinc magnus in consiliis

In caeli sedet solio,

Matre ligatur fasciis

Aselli in praesaepio.

4. Pro Fescenninis gloria

Ab angelis concinitur

Et pax in terrae curia

Benevolis promittitur.

5. Iesu, Mariae filio,

Sit sempiterna gloria,

Qui dempto hoc exsilio

Coronet nos in patria.

Ad Laudes.

1. Splendor paternae gloriae,

Qui clares te videntibus,

Verusque sol iustitiae,

Nostris refulge mentibus.

2. Da, carnis ut mysterium,

Quod patuit pastoribus,

Ad verae vitae praemium

Sit profuturum omnibus.

3. Te Deum, Dei filium,

Ex David factum semine,

Regem regum eximium

Secundam carnem, Domine,

4. Mortalem et pontificem

Magorum fantur munera;

Caput, per mortis calicem

Membrorum sana vulnera.

5. Iesu, Mariae filio.

Ad Primam.

1. Iesu, decus angelicum,

Dans tuis lumen caelicum,

Lux lucis invisibilis,

De matre natus humilis,

2. Virtutes pueritiae

Tuae, cuius deliciae

Sunt esse cum hominibus,

Nos instruant virtutibus.

3. Tibi Mariae genito

Cum patre et paraclito

Sit honor et victoria

In sempiterna gloria.

Ad Tertiam.

1. Uti sponsus de regio

Processit matris gremio

Gigas naturae geminae

Ex sacra natus virgine,

2. Exsultans viam currere,

Errantem ovem quaerere,

Ut bonus pastor umeris

Hanc reportaret superis.

3. Tibi Mariae filio.

Ad Sextam.

1. Nunc Christum olim patribus

Promissum Deus gentibus

Notum fecit infantulum,

Ecce, in cunis parvulum.

2. Agamus grates iugiter

Cum angelis, qui dulciter

In summis laudes resonant

Nobisque pacem intonant.

3. Tibi Mariae filio.

Ad Nonam.

1. Qui descendisti, Domine,

In alvum sacrae feminae,

Ut ros in lanam velleris,

Iesu, laus nostri generis,

2. Emunda nos a sordibus,

Da nostris pacem cordibus,

Ut collaudantes pariter

Te hymnizemus iugiter.

3. Tibi Mariae filio.

Ad Vesperas.

1. Candor aeterni luminis

Et sine labe speculum,

Fulgor divini numinis,

Iubar illustrans saeculum,

2. Ex patre ante saecula

Qui genitus es, Domine,

Post temporum curricula

Ex matre natus virgine,

3. Quae traxit te dilectio,

Ut nostram carnem sumeres,

Quae vicit te compassio,

Ut morte nos redimeres?

4. Te cogat, ut perenniter,

Quem nuntiavit Gabriel,

Nos serves, ut nunc iugiter

Nobiscum sis, Emanuel.

5. Iesu Mariae filio.

Ad Completorium.

1. Christe, nostra redemptio,

Amor et exspectatio,

Deus, salvator populi,

Homo in fine saeculi,

2. Non ex virili semine,

Sed mystico spiramine,

Ut parvulos nos subleves,

Tam grandis parvus factus es.

3. Tibi Mariae filio.