45. De s. Gregorio Magno.

1. Laudes canamus

2. Nostro redemptori
Christo, qui venit

nos salvare

3. Et livore suo
sibi dedicare
''ecclesiam
''candidatam,

4 Mundans eam

semper rivulis inebreatis,

5. Rigans montes

de superioribus nubibus,

6. Ut valles abundent
frumento
et hoc sollemnio

7. Una proclament
canentes,
odas tripudiantes:

8. Eia, egregio
papae Romano,
doctori pangamus Gregorio,

9. Qui fulsit mundo
ut novum sidus
doctrinis, exemplis, virtutibus.

10. Qui genus
eximium

et sanctum, quo nituit,
magnifice extulit.

11. Cui pneuma
ut columba
in auriculam stillavit
documenta mystica.

12. Mundum contempsit
et abiecit;

13. Pompas et opes
Christo dedit.

14. Septeno
instructus
flamine condidit
septena coenobia.

Angelus

hunc petit ut naufragus.

15. Agapem

quaerit, tribus vicibus

Accipit
et reddit;

discum argenteum
demum laetus percipit.

16. Post haec assumitur
Christoque monstrante
papa constituitur.

17. Mox inguinariam
pestem restrinxit
plebemque suam sanavit.

18. Psallentum

choris modulamina

composuit

dulcisona hymnizans.

19. Anglorum

gentem convertit ad Christum

totumque

praedicans illustrat mundum.

20. E tenebris

fratres functos

prece solvit excommunicatos.

21. Ex ignibus
inferorum
Traianum tyrannum eruit,

22. Quem gratia Dei
tam plene perfudit
clementia,

23. Ut, quidquid habere
posset, gratis Christo
distraheret.

24. Virginum

Romae sacrarum
pavit tria milia.

25. Corporis

Christi panem carnis
mutat in effigiem.

26. Angelum Dei
pavit,

a quo post audivit,
quod se Christus elegit.

27. Magos caecavit,
equo

daemonem fugavit
et ecclesias ornavit.

28. Aegra caro eius semper fuit,
mens tamen intenta caelo, ubi
nobis impetret beata
praemia sanctorum.