50. Oratio de hoc praedulci nomine Iesu.

1. Ave, Iesu,

nomen mirabile,
Patris verbum
inenarrabile
Atque sapientia.
In omnibus

par es genitori,
Per te facti

sunt caelestes chori,
Homines et omnia.

2. Quem hominem

tantum dilexisti,
Quod protinus
sibi subiecisti
Omnia terrestria.
Qui vetitum

pomum cito edens,
Se suosque

morte fera laedens,
Amisit caelestia.

3. Ne perderes

hos, quos condidisti,
Post a patris
sinu descendisti
In uterum virginis,
Ubi summis

ima coniunxisti,
Cum benigne
tecum univisti

Substantiam hominis.

4. Ave, Iesu,

Deus incarnatus,
Deus homo,

de virgine natus,
Postque octava die
Pro salute

nostra circumcisus,
Inde captus,
derisus, occisus

Per plenos invidiae.

5. Per hanc mortem
mortem occidisti,
Quam ardenter
nosque dilexisti,

Demonstrans, Iesu pie.
Resurgendo

vitam reparasti,
Ascendendo

portam reserasti
Caelestisque patriae.

6. Nunc de sede
tuae maiestatis
Ad nos clamas:
vos, qui laboratis
In peccatis, currite,
Iugum leve

meae caritatis
Propter tanta
dona pietatis

In vobis suscipite.

7. Ave, Iesu,

auctor clementiae,
Peccatorum

tota spes veniae,
Dona mihi veniam;

Mentem meam

reple dulcedine
Caritatis

atque munimine,
Ut te solum sitiam.

8. Amor tuus

lumen est mentium,
Favus mellis,
dulcedo cordium
Pigmentumque caelicum;
Omne prorsus

excedit gaudium,
Omne simul-
que desiderium,

Vinum est angelicum.

9. Tua luce,

Iesu, clarifica
Meam mentem,
vino laetifica

Affectum mellificans,
Ut te solum

semper esuriam,
Te, dulcedo
vitaeque, sitiam

Laudes tuas replicans.

10. Ave, Iesu,

totus amabilis
Et prae cunctis
desiderabilis,

Omnem sensum superans,
Cuius amor

cor meum afficit,
In quem tota
mens mea deficit

Te solum desiderans.

11. Ex hac carne

dissolvi cupio,
Tecum esse
in illo gaudio
Angelicae curiae;
Tu me trahas

ex hoc exsilio
Et reponas
in tuo gremio,
Rex misericordiae.

12. O quam laetus,

cum te invenero,
Et quam felix,
cum te tenuero
In caelesti patria;
Tunc amplexus

casti, tunc oscula
Erunt mihi

de te per saecula
saeenlorum dulcia.