QUAESTIO II.

Utrum difficultas intelligendi sit ex parte intellectus vel rerum cognoscibilium?

Arist. 2. met. c. 1. et lib. i. cap. 5. Albert. 2. Met. O. 2. Alens ibidem cap. 1. textu 6. D. Thom. lect. i. Ant. Andr. q. 2. Flandria quaest. 1. art. 3. Fonsec. cap. 1 . q. 1. sed. 2. Snar. disp. 9. Met. sect 3. Hurtad. disp. 7. Met. sect. 2. Metuisse 2. Met. 3. q. 7.

Quod ex parte rerum, probatio : Res sunt cognoscibiles inquantum sunt in actu, et certae in se et determinatae, ex 9. hujus, cap. ult. text. com. 21. et seq. sed multae sunt res de se potentiales, ut materia: incertae, ut motus et tempus: indeterminatae, ut infinitum; ergo difficultas intelligendi tales res, est ex parte rerum, non ex parte intellectus nostri. Confirmatur ista ratio per Commentatorem 1. Metaph. secundum translationem suam, com. 1. qui dicit quod difficultas intelligendi formas materiales, est ex parte ipsarum formarum, non ex parte nostra. Item, quando materia est summe disposita ad susceptionem formae, non est difficultas ex parte materiae recipiendi formam, sicut patet de lumine in medio: quia enim medium est summe dispositum, quantum est de se, ideo difficultas non est ex parte medii recipiendi formam, sed intellectus est de se summe dispositus ad cognoscendum res, quia ibi non est nisi sola privatio cognitionis ; non enim est ibi aliquod contrariam cognitioni rerum, quia si sic, in parte intellectiva posset esse alteratio, quod negat Philosophus 7. Physicor. t. c. 20. Item, difficultas non est ex parte intellectus cognoscendi, vel intelligendi excellentia intelligibilia, sicut ex parte sensus sentiendi excellentia sensibilia, quia intellectus non corrumpitur ex excellenti intelligibili, sed habilitatur ad intelligendum, quia non est virtus organica ex 3. de Anima, text. com. 7. 67. et 68. 2. de Anima. text. com. 133. sensus vero corrumpitur ex excellentia sensibilis, quia est virtus organica: ergo, etc. Ad oppositum est Philosophus in 2. hujus, cap. 1. text. comment. 1. non est in rebus difficultatis cau sa, sed in nobis : Sicut nycticoracum oculi ad lumen diei, etc. sic animae nostrae intellectus ad ea quae sunt manifestissima naturae.