49. Hymnus alius de eadem.

1. Ave, virgo tu beata,
Tu ave, mundo dominans,
Ave, tu glorificata,
Tu ave, mundum luminans,
Ave, tu sanctificata,
Tu ave, sanctos roborans.

2. Ave, tu iam coronata,
Tu ave, fama resonans,
Aveque, tu exaltata,
Tu ave, fructum germinans,
Ave, tu nimis laudata,
Tu aveque vivificans,
Ave, sancta tu creata,
Tu ave, sis nos liberans.

3. Virgo, hortus tu conclusus,
Ave, rosa caritatis,
In te mansit gloriosus,
(Tu) viola humilitatis,
In te fuit gratiosus,
Lilium es castitatis,
In te Christus virtuosus,
Radix tu virginitatis.

4. In te partus luminosus,
Tu es semen veritatis,
In te Christus odorosus,
Tu es lignum sanctitatis,
In te sanctus, vigorosus,
Tu es radix honestatis,
In te actus religiosus,
Vos pro nobis assistatis.

5. luva praegnantes feminas,
Ut non in partu pereant,
Eas clamantes audias,
Partum perfectum habeant,
Tu eas salvas facias,
Ut ad salutem veniant.

6. Da portum navigantibus,
Eis aufer tempestates,
Succurre proclamantibus,
Eis tolle gravitates,
Sis salus infirmantibus,
Monstra tuas dignitates.

7. Defende nos a fulgore,
Non moriamur subito,
Non pereamus flumine,
Simus in statu inclito,
Nos tu iucunda lumine,
Stemus in tuo gaudio.