49. De Nominibus et Titulis BMV.

1. Ave, vena veniae,

Torrens voluptatis,
Oleum laetitiae,

Rivus largitatis,
Aqua sapientiae,

Cista deitatis,
Me de peccatis

munda tu fons pietatis.

2. Botrus abundantiae,

Vitis bonitatis,
Propago prudentiae,

Palmes honestatis,
Tu racemus gratiae,

Uva puritatis,
Virgo grata nimis,

me coeli junge beatis.

3. Cedrus excellentiae,

Hysopus amoris,
Tu misericordiae

Mater et honoris,
Palma patientiae,

Balsamus odoris,
Melle tui roris

me pascas omnibus horis.

4. Diadema gloriae,

Lilium candoris,
Myrrha poenitentiae,

Thalamus pudoris,
Semita justitiae,

Clibanus ardoris,
Me conjunge choris

paradisi valde decoris.

5. Electrum praefulgidum,
Splendor firmamenti,
Vetus ebur viridum,
Liber documenti,

Liquor sanans languidum,

Arca testamenti,
Parce mihi flenti

misero peccata luenti.

6. Fomes fovens frigidum,

Dulcedo pigmenti,
Solum semper solidum

Castrum tutamenti,
Unda lavans sordidum

Adepsque frumenti,
Tu sustamenti

mihi panem frange petenti.

7. Granum sine palea.

Gemma virtuosa,
Tu vita coccinea,

Tu vita jocosa,
Engaddi tu vinea,

Tu luna formosa,
Crimina probrosa

mea dilue, lux radiosa.

8. Humus tu virginea,

Tamen fructuosa,
Tu fiscella scirpea,

Virgo gloriosa,
Tu turris eburnea,

Porta speciosa,
Vincula nodosa,

mea solve, salus pretiosa.

9, Juge sacrificium,

Satisfactionis
Propitiatorium,

Thus devotionis,
Saltus aedificium,

Vas electionis,
Me conjunge bonis

sanctis coelique colonis.

10. Raritatis scrinium,

Claustrum unionis,
Amoris incendium,

Rubus visionis,
Celsum David solium,

Vellus Gedeonis,
Virtus Samsonis,

mihi da pacem Salomonis.

11. Legis consummatio

Viaque justorum,
Orbis exsultatio,

Gloria sanctorum,
Israel redemptio,

Mater orphanorum,
Me profectorum

fac luce frui monachorum.

12. Martyrum compassio,

Comes confessorum,
Virginum devotio,

Lux apostolorum,
Te collaudat concio

Tota beatorum,
Ad vitam quorum

me perduc, spes miserorum.

13. Nardus recens, humilis,

Gutta delicata,
Virga Jesse nobilis,

Fructu fecundata,
Scala Jacob stabilis,

Sursum elevata,
Mens mea purgata

per te sit, virgo beata.

14. Ortus delectabilis,

Arca deaurata,
Terra Jesse utilis,

Flore decorata,
Virgo venerabilis,

Stirpe David nata,
Per te vita data

mihi sit paxque reparata.

15. Peccatorum venia,
Annus jubilaei,
Hierusalem filia,
Templum veri Dei,

Fidei constantia,

Refugium rei,
Tu miserere mei,

mater mirae speciei.

16. Quid in parsimonia

Sperant pharisaei,
Quare phylacteria

Dilatant Esaei,
Inflati scientia

Sunt ut Saducaei,
Unde memento mei,

tu vera dies requiei.

17. Radix aromatica,

Tu dulcis resina,
Piscina probatica

Templique cortina,
Sanitatis physica,

Vitae medicina,
Serves regina,

me a morte repentina.

18. Salve, laus prophetica,

Stella matutina.
Cantus, prosa, musica,

Rosa sine spina,
De te sua cantica

Cantat lex divina,
A me declina

mortem vitamque propina.

19. Tu castrum tutissimum,

Quod bene vallatur,
Domus, aula, civitas,

Quae bene fundatur,
Tu virtus, tu caritas,

Quae non minoratur,
Quae concedatur

mihi per te nec moveatur.

20. Via vitae, veritas,

Quae non deviator,
Castitatis puritas,

Quae non violatur,
Aeterna felicitas,

Quae justis optatur,
Haec concedatur

mihi et nunquam renuatur.

21. Xristi mater crederis,

Virgo valitura,
Virgo vere diceris,

Contra carnis jura
Nam parens efficeris

Pariendo pura,
Solve tua cura,

quibus artor, vitia dura.

22. Yris nostri foederis,

Jaspidis figura,
Piaculum sceleris,

Nubes non obscura,
Tuos nunquam deseris,

Alma creatura,
Ad bona ventura

trahe me, felix genitura.

23. Ziph florens, stirps regia,

Viscera commota,
Nostra tympanistria,

Ruth oleo fota,
Tu cella vinaria,

Tu Judith devota,
Per te sit lota

mea mens bene sorderemota.

24, Et super haec omnia
Tu sophia tota,
Inter duo media
Cherubim es rota,

Perfecta scientia

Tu bene promota,
Mater Dei, Maria,

mihi da tibi reddere vota.

25. Consolatrix optima,

Tu meum solamen,
Virgo prudentissima,

Fer mihi juvamen,
Ut mea sic anima

Sentiat juvamen,
Quod post certamen

mihi pacem det Deus. Amen.

26. Alma virgo virginum,

Mater illibata,
Vera salus hominum,

Felix advocata,
Est per te lux luminum

Nobis ministrata,
Mater es et nata,

pia virgo consecrata.

27. Audi, decus numinum,

Metra copulata
Rhythmis in dictaminum

Tibi consecrata,
In ploratu criminum

Meorum dictata,
Ad te delata

et bene sint tibi grata.