51. De ss. Iusto et Clemente.

1. Gloriam aeterni patris
in sanctis suis

2. Veneramur omnes
sonoris vocibus
concordantes,

3. Qui regnans in caelis
sanctorum splendor est
mirabilis;

4. Cuius gratia
fax haeretica
procul recessit a Tuscia;

5. Urbs Anconia
Christo credula
fit per sanctorum suffragia.

6. Vandalica

gens Christi populum
praeoccupans
cinxit per circulum,

7. Ut subditum

vulgus catholicum

perimeret

famis per interitum.

8. Sed ad Christum
Clemens et Iustus
profusis precibus,
flexis terra genibus,

9. Poscunt sibi
panis et cibi
per Dei gratiam
exhiberi copiam.

10. Diffugiunt hostes

te, Christe, sentientes
sanctis assistere
in omni afflictione ;

11. Anconiae cives

in fide persistentes

Deum glorificant,

qui salvat in se sperantes.

12. Post hoc locum
non longe extra
urbis moenia

13. Emundantes

serpentes fugant
et daemonia.

14. Ibi ieiuniis instantes,

operibus bonis inhaerentes

Deo placitas

uno momento reddunt animas.

15. Horum suffragiis iuvemur,
ut in caelis iugiter laetemur
coniuncti Domino
finito mundi huius termino.

16. Quod ipse nobis concedat,
qui vivit et regnat.