52. Salutationes BMV.

1. Salve, mater salvatoris,
Nati nata genitoris,

Genitrix ingenua ;
Cui semper et ubique
Devoti fideles quique

Digne flectunt genua.

2. Salve, cui scripturarum
Nec non et creaturarum

Series deserviunt,
Dum hinc digne praedicando,
Hinc decenter figurando

Laudes tuas pariunt.

3. Salve, coelum spiritale,
Summum atque speciale
Summi regis solium;
Coelum cum terra creatum,
Sed a terra sublimatum
Summum ad fastigium.

4. Salve, vera casa solis,
Veri Dei verae prolis,
Aula Dei regia ;

Stellis virtutum celata,
In qua digne sunt celata
Secreta coelestia.

5. Salve, lucis lux aurora,
Lux excellens, lux decora,

Tenebrarum nescia;
Digne dies appellata,
Quia solis illustrata
Speciali gratia.

6. Salve, coeli firmamentum,
Terrarum operimentum,

Praepotens protectio
Es tu tamen terrenorum,
Quae duum testamentorum

Facta es in medio.

7. Salve, terra laude digna,
Herbas virentes et ligna

Producens fructifera ;
Rore quidem sacri flatus
Sacros reddens cogitatus

Et virtutum opera.

8. Salve, gemma firmamenti,
Firmamenti jam recenti

Ad ornatum insita;
Magnum luminare poli,
Minus tamen, quia soli
Claritate subdita.

9. Salve, semper lucens luna,
Cujus eadem et una

Jam manet integritas,
Qua gentilis illustratur
Nox erroris, et mundatur
Peccantum impuritas.

10. Salve, terra, flos terrarum,
Nam virtutem aliarum

Excedis et speciem;
De qua conscendit fons vitae
Universam rigans rite

Terrae superficiem.

11. Salve, sacrum terrae latum,
In qua deitatis sputum,

Rigans, quod aruerat,
Hominem de te formavit,
Qui humanum reformavit

Plasma, quod perierat.

12. Salve, Dei paradise,
Aeternaliter provise

Nostrum ad subsidium,
Quae dum Christum genuisti,
Lignum vitae protulisti

Producens in medium.

13. Salve, loce voluptatis,
Quae verae satietatis

Emisisti filium,
Dum arentes irrigantem,
Sitientes satiantem

Genuisti filium.

14. Salve, mulier beata,
Quae constanter animata

Ope sancti spiritus
Caput serpentis antiqui,
Versipellis et iniqui,
Constrivisti funditus.

15. Salve, mater salvandorum,
Per quam digne defunctorum
Vita digne redditur;

Recte per Evam signata,
Recte nam interpretata
Eva vita dicitur.

16. Salve, nostri vas salutis,
Arca vere, vas virtutis,

Vas coelestis gratiae;
Vas ad unguem levigatum,
Vas decenter fabricatum

Manu sapientiae.

17. Salve, cujus pietatis

Sinus patens cum mundatis

Et immundos colligit ;
Hos, ne mari submergantur,
Illos, ut eripiantur,
Sicque nullum abigit.

18. Salve, princeps generosa,
Stirpe satis gloriosa,

Illustris prosapia,
Recte per Saram signata,
Cujus partu sunt collata

Mundo vitae gaudia.

19. Salve, nata Bathuelis
Et felici Gabrielis

Salutata famine,
Isaac nunc desponsaris,
Cui digne copulans

Sacro plena flamine.
20. Salve, vera Jacob scala,
Per quam conscendentes mala

Mundi vitant devia,
Dum effectu te sequentes
Vel per te proficientes

Tendunt ad coelestia.
21. Salve, scala, qua ascendunt
Contemplantes et descendunt,

Dum eis humanitas
Christi per te reseratur,
Et eisdem declaratur

Humanata deitas.
22. Salve, fidelis fiscella,
In cujus felici cella

Pharaonis filia
Legis suscepit latorem,
Hoc est suum redemptorem

Gentium ecclesia.

23. Salve, rubo figurata,
Sacri flatus fecundata,
Non usta succendio,
Quam illaesam conservavit,
Quam nec ulla violavit
Carnis aestuatio.

24. Salve, coelum nube carens,
Panis coeli sacra parens

Vitae stillicidium,
Fluens, quando protulisti
Verum manna, corpus Christi,

Ad esum fidelium.

25. Salve, coelo mons vicine,
Quem vel nunquam vel non sine

Poena tangit bestia,
In quo legem caritatis
Et totius bonitatis

Diva dedit gratia.

26. Salve, felicis figmenti
Arca novi testamenti,

Arca novi foederis,
Per quam servus herae datur
Et factori foederatur

Pace data posteris.

27. Salve, virga, quam direxit
Fides recta, spes erexit,

Inflammavit caritas ;
Flore vernans, fructu grata,
Cujus Christum illibata

Protulit integritas.

28. Salve, sponsa verbi Dei,
Quam Jahel, Haber Cinaei

Conjux, signat congrue,
Nam dum anguem contrivisti,
Sisaram interemisti

Superatum strenue.
29. Salve, Gedeonis vellus,
Quo ma dente sicca tellus

Florem vitae recipit ;
Flos est Christus, tellus arens
Mens amore Christi carens,

Sed hunc per te percipit.
30. Salve, vera Sunamitis,
Virgo super omnes mitis,

Pulchra prae virginibus,

Quae in membris frigescentem
Christum reddis calescentem
Tuis in amplexibus.

31. Salve, templum Salomonis,
Domus exauditionis,

Regis regum regia,
Fide firmiter fundata,
Spe conscendes, consummata
Caritatis copia.

32. Salve, sacer thronus Christi,

Quae sola digna fuisti

Sessorem suscipere,

Candens ebur castitatis,

Micans auro caritatis,

Miro vernans opere.

33. Salve, Sion sublimata,
Hierusalem urbs beata,

Verae pacis civitas ;
Sion, de qua lex exivit,
Urbs, de qua verbi prodivit

Calciata deitas.

34. Salve, sacra parens Christi,
Quem dum virgo peperisti,

Juxta vaticinium
Factus est nobiscum Deus,
Quem dum repellit Judaeus,

Fit propinquus gentium.

35. Salve, virens virga Jesse,
Quam frequenter et expresse

Signant vaticinia ;
De qua florum flos exivit,
Quem decenter redimivit

Septiformis gratia.
36. Salve, petra firmitatis
In deserto vanitatis

Constans et immobilis,
De qua missus est salvator,
Coeli, terrae dominator,

Sed ut agnus humilis.
37. Salve, terra Deo grata,
Quae de supernis rorata

Deitatis pluvia
Germinasti salvatorem,
Nova terra novum florem

Renovantem omnia.

38. Salve, nubes claritatis,
Exsors nostrae gravitatis,

Lenis et lucifera,
Quam scandens Christus intravit
Mundum, in quo condemnavit
Tenebrarum opera.

39. Salve, virtute sublimis
Abies myrteque nimis

Temperans et humilis,
Quae pro prima peccatrice
Conscendisti de radice

Stirpis non ignobilis.

40. Salve, mater novitatis,
Renovatrix vetustatis

Nil vetustum sapiens,
Quae virum circumdedisti,
Christum alvo dum gessisti,

Virgo virum nesciens.

41. Salve, porta principalis,
Aditus orientalis,

Porta soli pervia
Principi, per quam intravit
Templum, quod et illustravit

Pietatis gratia.

42. Salve, mons, de quo praecisus
Lapis, per quem est elisus,

Quem signat iconia;
In immensum montem crevit
Et totam terram replevit

Majestatis gloria.

43. Salve, decor virginalis,
Virgo vere pars australis

Et mons fructu fertilis,
De quo venit ad nos Deus,
Factus sed ut homo reus

Forma servi similis.

44. Salve, mulier formosa,

Cui Judith sat famosa

Alludit victoria,
Per quam Satan suffocatur,
Et gens tua liberatur

De mortis angustia.

45. Salve, cujus castitatis
Sinu comprehendi gratis
Voluit rhinoceros,

Cujus unica majestas,
Cujus discreta potestas
Spoliavit inferos.

46. Salve, summam quae sophiam,
Patri Thobiae Thobiam

Genuisti filium,
Anna recte nominata,
Quae sic donis es ditata
Gratiarum omnium.

47. Salve, sol serenitate
Nitens, fervens caritate,

In quo tabernaculum
Suum Christus collocavit,
Quando suum visitavit

Pugnaturus populum.

48. Salve, conclavis amoena,
Quia sacro flatu plena,

Quam salvator subiit
Et hinc sibi desponsata
Carne jam deificata

Tanquam sponsus prodiit.

49. Salve, coelum, coelibatum
Semper servans, praeparatum

Dei habitaculum,
De quo clementer respexit
Et factus prope respexit
Universum populum.
50. Salve, regina coelorum
Dextrae regis angelorum

Adsistens in gloria

In vestitu deaurato

Virtutumque variato

Plena confluentia.

51. Salve, summi regis nata,

Aure cujus inclinata

Per obedientiam
Te cupivit ad decorem
Rex, oblitam mundi florem
Et gentis stultitiam.
52. Salve, virgo, cujus vultum
Dignum tibi dantes cultum

Deprecantur divites,
Vere siquidem ditantur
Nec de plebe reputantur
Tuae laudis milites.

53. Salve, sponsa gloriosa,
Foris et intus formosa,

Cujus omnis gloria
Ab internae puritatis,
Cordis et humilitatis

Procedebat gratia.

54. Salve virgo, quam sequuntur
Et ad regem adducuntur

Continentes animae,
Dum hic per devotionem,
Illic per conjunctionem

Fiunt tibi proximae.

55. Salve, civitas jucunda,
In quam sacri flatus unda

Confluens ad cumulum
Digne te laetificavit
Et dignum sanctificavit
Christo habitaculum.

56. Salve, templum sanctum Dei,
In quo consequuntur rei

Peccatorum veniam,
Quo salutem susceperunt,
Quam prophetae promiserunt,

Et misericordiam.

57. Salve, terra visitata
Affatimque debriata

Sacri flatus gratia,
Quam in te multiplicavit
Quaque te laetificavit

Nati diligentia.
58. Salve, terra benedicta,
Per quam diu derelicta

Populi captivitas
Captivatur, visitatur,
Atque plebis relaxatur

Perstringens iniquitas.
59. Salve, terra, quam rigavit
Et hinc ad nos derivavit

Se misericordia
Orta de te veritate,
Sicque sunt coosculatae

Pax atque justitia.
60. Salve, terra, quae dedisti
Fructum vitae, corpus Christi,

Cujus te benignitas

Data prius praeparavit,

Et sic in te declinavit

Incarnanda deitas.

61. Salve, civitas famosa,
De qua digne gloriosa

Dicta sunt praeconia;
Sed quaecunque praedicantur
De te, tuis superantur

Meritis et gloria.

62. Salve, domus fabrefacta
Atque decenter compacta

Manu sapientiae,
Sibi quam aedificavit
Et columnis roboravit

Septiformis gratiae.

63. Salve, fortis et fidelis
Mulier, cujus de caelis

Pretiosum pretium
Sacri flatus primum empta
Donis ac demum redempta

Proprium per filium.

64. Salve, pulchra et pudica
Sponsi mater et amica

Fide, forma, facie,
Digna partu, digna thoro,
Digna sponso tam decoro,

Qui sol est justitiae.
65. Salve, sancta, flos sanctarum,
Sponsa, regina sponsarum,

Inter omnes unica,
Unde digne famulantur
Tuae laudi, quam effantur

Canticorum cantica.

66. Salve, sponsa sponso grata,
Ore cujus osculata

Primis gaudes osculis,
Per quem tibi, per quem cunctis
Parietibus conjunctis

Pax est data populis.
67. Salve, digna nutrix Christi,
Dulcibus quem nutrivisti

Et lautis uberibus,
Quae palato piae mentis
Cunctis plus delectamentis

Sapiunt carnalibus.

68. Salve, cujus nomen sanctum
Est unguentum aegrotantum,

Spes et invocatio,
Quos et tuae sanctitatis
A sanctis dilecta satis

Perfundit opinio.

69. Salve, quam is post se traxit,
Qui se de te praeextraxit,

Cujus in odoribus
Unguentorum cucurristi,
Uncta quibus exstitisti

Tuis prae consortibus.

70. Salve, quam prius in tua
Cella susceptus rex sua

Duxit in cellaria,
Ut illius secretorum
Ad laetitiam tuorum
Jure fias conscia.

71. Salve, quam nimirum recti
Tuis meritis illecti

Amant unanimiter,
Qui tuorum meritorum
liberumque geminorum

Memores sunt jugiter.

72. Salve, nigra sed formosa,
Nigra sed invidiosa,

Nigra derogantibus,
Non in te naturae regem,
Sed tantum naturae legem

Prave perpendentibus.

73. Salve, tota pulchra bonis
Sicut pelles Salomonis

Carnis mortificio,
Vera Jerosolimita,
Quia carnis expedita

Prorsus a dominio.

74. Salve, quam decoloravit,
Dulcem natum quae damnavit,

Fervens persecutio ;
Sed nec talem te miratur,
Cui matris intimatur

Amantis affectio.

75. Salve, quam tunc impugnarunt,
Prole dulci dum orbarunt,
Tuae matris filii,

Et velatum cor habentes
Adhuc perstant persequentes
Veritatis inscii.

76. Salve, fida plurimarum
Custos facta vinearum,

Dum, linquens nequitiam
Synagogae, singularum
Ad curam ecclesiarum

Transis et custodiam.

77. Salve, quondam Pharaonis,
Hoc est antiqui draconis

Infestata curribus,
Quos recte triumpho Christi
Similata submersisti

Aquis spiritalibus.

78. Salve, cujus nardus grata,
Hoc est virtus hac signata,

Odorem exhibuit,
Dum summi in sinu patris
Et in tuo dignae matris

Alvo rex accubuit.

79. Salve, cui myrrha fuit
Dilectus, cum nostra luit

Ut scelestus scelera,
Myrrha mortem tolerando,
Myrrha semper conservando

Morans inter ubera.
80. Salve, digne comparata
Flori florum, summo lata

Lilio convallium,
Inter filias formosa
Velut inter flores rosa,

Inter spinas lilium.

81. Salve, plena caritate,

Quam pia benignitate,

Pia diligentia
Tunc in te rex ordinavit,
Cum inductam collocavit

In cella vinaria.
82. Salve, floribus fulciri
Atque circumamiciri

Malis pie gestiens,
Motu quidem caritatis
Nostrae motus puritatis

Et fructus esuriens.

83. Salve, cujus sponso grata

Facies et vox optata,

Dulcis ejus auribus,

Ergo faciem ostende

Et ei preces impende

Tuis pro supplicibus.

84. Salve, gracilis et recta
Virgaque per spem erecta,

Odora virtutibus,
Desertum deseruisti,
Per quod summis ascendisti

Gratiarum gradibus.

85. Salve, pulchra velut lana,
Ut sol inter omnes una,

Praeelecta singulis,
Dum ut aurora procedens
Jubar tenebris succedens

Praebuisti saeculis.

86. Salve, dilectum enixa,
Super quem demum innixa

Ac plena deliciis
De deserto conscendisti
Dilectoque consedisti

Coeli fruens gaudiis.

87. Salve, mater Salomonis,
Quem in desponsationis

Ejus et laetitiae
Die digne coronasti
Duplicique decorasti

Corona victoriae.
88. Salve, lecte Salomonis,
Quem dignae defensionis

Causa fortes ambiunt,
Orthodoxi nunc doctores,
Quondam angeli tutores

Nuncque tibi serviunt.
89. Salve, proles prophetarum,
Regum et patriarcharum,

Salomonis ferculum,
In quo digne se gestandum,
Per quod pie sustentandum

Suum duxit populum.
90. Salve, turris vere fortis,
Supra metas nostrae sortis,

Velut mors dilectio ;

A mundo te separavit,

Quam nulla debilitavit,

Torrens persecutio.

91. Salve, novi testamenti
Fons ejusque complementi

Condigna materia,
Mater quidem novi regis,
In quo nobis novae legis
Nova luxit gratia.

92. Salve, quam, ut praedicebat
Atque crebro praecinebat

Cantio prophetica,
Sic gignendum pio patri
Praedixit piaeque matri
Pia vox angelica.

93. Salve, virgo desponsata,
Alteri sed conservata,

Quem coelestis nuntius
Sponsum tibi nuntiavit,
Et mox thalamum intravit

Idem Dei filius.

94. Salve, fons humilitatis,
Quae, licet felicitatis

Tuae tibi conscia,
Ancillam te nominasti,
Quam summa non ignorasti

Sublimatam gratia.

95. Salve, coelorum sessorem
Terrarumque possessorem

Pariens in stabulo,
Ac praesepe jumentorum
Cibo ditans angelorum

Atque vitae pabulo.
96. Salve, legis observatrix,
Quae legales ut peccatrix

Non habens piacula,
Hostias Deo dedisti,
In templo cum obtulisti

Agnum sine macula.
97. Salve, salvans salvatorem,
Dum Herodis ob errorem

Persequentis filium,
In Aegyptum transfugisti,
Vere pro amore Christi

Subiens exsilium.

98. Salve, digna Dei nutrix,
Custos, vigil et adjutrix

Digne tibi subditi,
Usque tempus praefinitum
Nostrum decreto sancitum
Persolvendi debiti.
99. Salve, matrum gloriosa,
Quam in cruce pretiosa
Dum penderet filius,

Juxta verbum Simeonis
Acerbae compassionis
Pertransivit gladius.

100. Salve, regina coetorum,

Quae post mortis et dolorum

Hausta scandens pocula
Sponso regi complantaris,
Cum quo regnans collaetaris

Per aeterna saecula.