52. In Visitatione BMV.

1 a. Visitatrix gloriosa,
Potens et imperiosa,
Iesu Christi generosa
Mater atque filia.

1b. Radix Iesse speciosa,

Virga florens et frondosa,
Quam rigavit copiosa
Deitatis gratia.

2 a. Auster lenis te perflavit
Et perflando fecundavit,
Aquilonem qui fugavit
Sua cum potentia.

2 b. Florem ergo genuisti,

Ex quo fructum protulisti,
Gabrieli dum fuisti
Paranympho credula.

3 a. Elisabeth exclamavit,
Ista dum consideravit,
Ipsam quando visitavit
Tua reverentia.

3 b. Ventre clausus exsultavit,
Motu quoque salutavit
Christum, quem tui gestavit
Uteri munditia.

4 a, O rem miram et novellam !
Venit mundi sol ad stellam,
Adit virgo dum vitellam
Ministrans ut famula.

4b. Nondum natus iubilizat,
Parens uter prophetizat,
Virgo quoque hinc hymnizat
Deo, a quo omnia.

5 a. Ergo, clemens et benigna
Cunctorumque laude digna,
Tuo nato nos consigna
Pia per suffragia ;

5 b. A te semper visitemur,
Maesti quoque consolemur
Et in fine sublevemur
Ad caeli palatia.