54. Hymnus de sancto Benedicto, praesente papa.

1. Tu, sancte Benedicte,
Tu papa duodecimus,
Tuum posse totum mitte,
Ut crescat fides melius,
Tu promissa serva stricte,
Tu quaeras hoc attentius.

2. Romae, ubi sedes sancta,
Digneris te reducere,
Ibi cunctis fidem canta,
Tu malos cura vertere,
Exstirpetur mala planta,
Qui cupit fidem laedere.

3. Fides tua exaltetur,
Omnis vivens sit adiutor,
Infidelis conculcetur,
Et exsurgat sanctus rigor,
Fides sancta dominetur,
Infidelis cesset vigor.

4. Fides sancta, orthodoxa
In toto mundo fulgeat,
Via cesset tenebrosa,
Quae iam a Deo deviat,
Tua fides odorosa
Errores cunctos revocat.

5. Qui non pugnat ad virtutes,
Hic incidit in vitium,
Qui reducit ad salutes,
Est optimum indicium,
Qui non delet posse lites,
Non gerit hic officium.

6. Qui obviare desinit
Illatis facinoribus,
Altissimi non meminit,
Non manet in honoribus,
Et hic, qui corde arguit,
Replebitur muneribus.

7. Tu, sancte summus pontifex,
Tuque geris alba signa,
Tu super omnes locuplex,
In te virtus omnis digna,
Tu regni Dei particeps
Tuque caritas benigna.

8. Mundus fide dealbetur
Clarescat [que] per speculum,
Per te fortiter pugnetur,
Ut regas totum saeculum,
Tua virtus dominetur,
Laudetur in perpetuum,
Tua sanctitas dignetur
Absolvere me servulum.

9. Candida signa indicant,
Ut tempus sit victoriae,
Tui fideles incitant,
Ut tibi sit memoriae,
Ut infideles redeant
Ad regem summae gloriae.

10. Cum tempus acceptabile
Dat Deus aut accidit,
Sumatur id amabile,
Beatus vir, qui accipit,
Nam tempus est mutabile,
Imprudens est, qui neglegit.