54. De Compassione BMV.

1. Ante crucem virgo stabat,
Poenas Christi cogitabat,
Totam se dilaniabat
Vultum lavant lacrimae.
2. Dicit virgo: Quid fecisti,
Quod delictum commisisti,
Quare crucem ascendisti?
Me dolentem respice.
3. Vos, Judaei, per errorem
Occidistis redemptorem,
Mundum salvans per amorem
Sua sacra passio.
4. Orbata sum filio,
Apostolos non video,
Quo vadam sola, nescio,
Non possum ultra vivere.

5. Dicit Jesus: O mater mea,
Non te turbet poena mea,
Praecedam vos in Galilaea,
Resurgam die tertia.

6. Johannes sit tibi filius,
Custos atque famulus
Eritque tibi bajulus
In hac mundi miseria.
7. Pater misit me ad mortem,
Vici jam draconem fortem,
Super me miserunt sortem
judaea gens incredula.
8. Mortem ergo non timeamus,
Omnes crucem diligamus,
Deo devote serviamus
Cum omni reverentia.