Sermo VIII .

Item, sermo fratris Bonaventurae editas coram rege et familia, Parisius in palatio regali.

Videbit omnis caro salutare Dei, Lucae tertio. Quadruplex est visio Dei. Prima est in mundi . creatura; secunda est in humana natura ass umt a tertia in humana conscientia; quarta in sua essentia. Prima visio est ut umbra in signo; secunda, ut sol in vitro; tertia, ut imago in speculo; quarta, sicut species in aperto.

I Videtur ergo Deus primo in mundi creatura, in qua et per quam origo rerum per creationem, distinctionem et ornatum et magnitudinem potentiae immensitatem eius clamat; ad Romanos primo : Invisibilia enim ipsius a creatura mundi per ea quae facta sunt, intellecta conspiciuntur, sempiterna quoque eius virtus et Divinitas etc.; Psalmus: Venite et videte opera Domini, quae posuit prodigia super terram.

Multitudo, pulcritudo incomprehensibilem sapientiam declarat; Sapientiae decimo tertio : A magnitudine enim speciei et creaturae cognoscibiliter poterit Creator horum videri.

Plenitudo et operatio et ordo et utilitas inexterminabilem bonitatem praedicat; Ecclesiastici quadragesimo tertio : Vide arcum et benedic eum qui fecit illum.

II Secundo, in humana natura assumta, et ista visione visus est a Patriarchis figuraliter cum desiderio; Exodi tertio: Vadam et videbo visionem hanc magnam, quare non comburatur rubus.

Ab Apostolis praesentialiter cum gaudio; Ioannis primo : Vidimus gloriam eius, gloriam quasi Unigeniti a Patre, plenum gratiae et veritatis.

A nobis speculariter cum merito; primae ad Corinthios decimo tertio : Videmus nunc per speculum in aenigmate.

A Beatis perspicaciter cum praemio; Isaiae trigesimo tertio : Regem in decore sua videbunt oculi eius.

III Tertio, in humana conscientia, et ista visione videtur triformiter, scilicet per industriam rationis et fidei assensum; Lucae decimo : B''eati oculi, qui vident quae vos videtis.

Per cordis munditiam et intellectus donum; Matthaei quinto : B eati mundo corde, quoniam ipsi Deum videbunt. ''

Per fervens desiderium et sapientiae gustum; Psalmus : Gustate et videte, quoniam suavis est Dominus.

IV. Quarto, in sua essentia, et hae visione videtur triformiter, scilicet praeclare et manifeste; primae Ioannis tertio: Videbimus eum, sicuti est.

Iucunde et gloriose; Isaiae ultimo : Videbitis, et gaudebit cor vestrum.

Perpetuo et sine fine; Ioannis decimo sexto : Iterum autem videbo vos, et gaudebit cor vestrum, et gaudium nemo tollet a vobis.