57. Hymnus de martyre.

1. Sunt sancti quidem martyres,
Qui passi sunt martyrium,
Sunt caelique participes
Per Iesum Christum filium,
Fuerunt corde bellices,
Sumentes iure proelium.

2. Fuit ipsis verus amor
Seu motus caritatis
Et in eis ignis ardor
Et defensor veritatis,
Nam cessavit mortis pavor
Disponentes crnciatis.

3. Sunt in caelo coronati,
Exsultant in laetitia,
Ibi manent honorati
Et sunt in Dei gratia,
Iubilantes, consolati
In nobili militia.

4. Qui fidelis est pugnator
Pro iustitiaque iure,
Manet ipse triumphator,
Sed disponens bonae curae
Deus eius munerator,
Si iam gerit ipse pure.

5. Non habet quis victoriam,
Si non pugnat hic constanter,
Nec habet ipse gloriam,
Si non vincit hic laetanter,
Non retinet memoriam,
Si iam perit hic instanter.

6. Nam primum est martyrium
Pro fide mortis passio,
Secundum est martyrium
Iniuriae remissio,
Sed tertium martyrium
Iam proximi compassio.

7. Vobis status militaris
Contra hostes proeliando,
Vobis ordo regularis
Corrigendo, praedicando,
Vobis amor parentalis,
Vos pro Deo moriendo.

8. Vos fuistis proeliati
Habentes vos victoriam,
Estis primo coronati
Habentes Dei gloriam,
Estis semper honorati
Per canticam memoriam.